ندى بسيوني تحكي موقفًا طريفًا مع عادل إمام: عرف صوت ضحكي من وسط الجمهور
كشفت الفنانة ندى بسيوني عن موقف جمعها بالزعيم عادل إمام خلال عرض مسرحية “بودي جارد”، مؤكدة أن هذه الواقعة كشفت لها حجم تركيزه الكبير مع الجمهور وحرصه على متابعة ردود أفعالهم أثناء العرض.
وقالت ندى بسيوني، عبر حسابها الرسمي على “فيسبوك”: “كنت بصور مسلسل مع الأستاذ الراحل الجميل عزت أبو عوف، وعلى فكرة اشتغلت معاه كتير، الله يرحمه كان فنان وإنسان عظيم”.
وأضافت: “في الوقت ده كان هو شغال في مسرحية “بودي جارد” مع الزعيم عادل إمام، وعزمنا نروح نتفرج على العرض، طبعًا أنا طيرت من الفرحة”.
وتابعت: “روحت المسرح والحجز بتاعي VIP، قعدت يا سيدي أتفرج وصوت الضحك بتاعي طالع طول الجزء الأول، أضحك بصوت عالي وأبص ألاقي الصف بتاعي ساكتين خالص ولا الهوا، فبقيت بكتم ضحكي وبسكت خالص، قلت أكيد أنا غلطانة في حاجة”.
وأشارت إلى أنه بعد انتهاء العرض دخلت لتسلم على الفنان الراحل عزت أبو عوف، وكان برفقة عادل إمام، لتفاجأ بالزعيم يقول لها: “يا ندى أنا كنت سامعك بتضحكي في الجزء الأول، وبعد كده سكتي.. ليه؟”.
وأوضحت أنها أخبرته بما حدث، قائلة: “قلتله اللي حصل وإن الصف بتاعي ساكتين خالص، عرفت بقى مين اللي قاعدين جنبي، يجعل كلامنا خفيف عليهم”.
وأردفت: “ولما رجعت البيت قعدت أفكر وسرحت في كمية تركيز عادل إمام وهو على المسرح، قد إيه مركز في “قياس” كمية الضحك، ومع إنه بينهي مشاهده لدرجة إنه كمان ميز “صوتي” من وسط الجمهور”.
واختتمت ندى بسيوني حديثها بالإشادة بمسيرة الزعيم، قائلة: “يعني كمان عارف مين في الصالة من صوته بس، مش من فراغ لقب الزعيم، مش من فراغ تربعه على عرش الكوميديا في مصر بجد، هو وأسماء قليلة جدًا زي الأساتذة العظماء سمير غانم ومحمد صبحي ورموزنا الكبيرة عبد المنعم مدبولي وفؤاد المهندس وغيرهم كتير، كل واحد فيهم هتلاقوه فعلًا بيدرس ويحلل ويذاكر جمهوره وشغله، النجومية مسؤولية كبيرة بجد، سهل أوي تنجح لكن صعب تستمر والناس تحبك على طول”