أروى جودة تكشف لـ"وشوشة" كواليس فيلم "الحياة منتهى اللذة" بعد تصدره التريند

فاجأت الفنانة أروى جودة جمهورها بكشف العديد من كواليس مشاركتها الأولى في السينما، وذلك بعد تصدر فيلم الحياة منتهى اللذة وأغنية حبيبي ياراجعلي من الفيلم مؤشرات البحث على جوجل ومنصات التواصل الاجتماعي خلال الأيام الماضية، مؤكدة أن عودة الفيلم للواجهة بعد نحو 20 عامًا أعادت إليها ذكريات لا تُنسى من بداياتها الفنية.

وفي تصريح خاص لـ"وشوشة"، تحدثت أروى جودة عن رد فعلها بعد تصدر الفيلم للتريند، قائلة:"زي ما انتي شايفة اتخضيت، ده أول فيلم عملته في حياتي، أول حاجة عملتها في حياتي أصلًا ساعتها أنا قلت لهم أنا مش بعرف أمثل ومش عايزة أمثل، قالولي لا لا تعالي إحنا عايزينك تعملي ضيف شرف مشهدين تلاتة كده، عشان إنتي Best Model فحبينا نزود أسماء يعني ووافقت ".

وأضافت أروى جودة قائلة:"كان ساعتها أستاذ مجدي كامل ونهى العمروسي بيساعدوني، بيحاولوا يدوني أي دروس تمثيل بس عشان أعرف أفهم إيه الموضوع، لأن أنا بالنسبة لي عمري ما كنت عايزة أبقى ممثلة، ولا عمري حسيت إني شاطرة كممثلة، لا هي هواية عندي، ومعنديش حتة إني أطلع أستعرض قدام الناس. عملتها مجاملة لنهاد رمزي الله يرحمها وبس، ومن ساعتها بقى عندي كارير".

أروى جودة تستعيد ذكريات أول وقوف أمام الكاميرا

وتابعت أروى جودة حديثها عن أول أيامها أمام الكاميرا، قائلة:"كانت أول مرة تخيلي أول مرة إنتي متفهميش أي حاجة وتلاقي نفسك واقفة قدام حنان ترك ومنة شلبي، كان بالنسبة لي خبرة حلوة أوي ومكنتش متوقعاها خالص، وطبعًا أستاذة منال، وزينة كانت في الفيلم، أنا قاعدة بفتكر لأن الفيلم عملته بقالي عشرين سنة".

واستكملت حديثها مسترجعة تفاصيل تلك الفترة، قائلة:"التوب الأزرق اللي كنت لابساه في الأغنية أنا كنت مخيطة عليه العقد ده علشان يبقى فيه أي حاجة، ودي كانت جيبة، وكان فيه ديزاينر مديها ليا هدية من تركيا، عشان ده وقت ما كسبت Best Model في تركيا، كانت فترة حلوة أوي في حياتي وقتها الحمد لله".

أروى جودة توجه رسالة شكر لصناع الحياة منتهى اللذة

واختتمت أروى جودة حديثها بتوجيه الشكر لكل من دعمها في بداياتها الفنية، قائلة:"حنان ترك كانت حنينة أوي وكانت طيبة أوي وكانت جدعة، بتحاول دايمًا تساعد، ومجدي كامل مش هنساله أبدًا، وكل حاجة، ومنال الصيفي المخرجة كانت جميلة، وكانوا صابورين جدًا وذوق معايا، وهما عارفين إني معرفش حاجة في التمثيل. كل واحد كان بيقدر يساعد، بيساعد، أي حد عنده نصيحة، أي حد شايفني مرتبكة، أي حد شايفني مش فاهمة أعمل إيه، كل واحد كان بيساعدني بطريقته، فدي كانت حاجة حلوة أوي".