رمضان محمد لـ"وشوشة": أغنية "وبقيت بحبه" دفعت رامي جمال لتغيير شكل ألبومه بالكامل
تحدث الشاعر رمضان محمد عن كواليس تعاونه مع الفنان رامي جمال في أغنية وبقيت بحبه، إحدى أغنيات ألبوم دي علامة ، كاشفًا عن الدور الذي لعبته الأغنية في تغيير رؤية رامي للألبوم بالكامل.
وفي تصريح خاص لـ"وشوشة"، قال رمضان محمد:"دي أول مرة أقدم مع رامي أغنية حب سريعة، لأن أغلب تعاوناتنا قبل كده كانت في منطقة الدراما، وكنت حابب المرة دي أجرب معاه لون مختلف".
وأضاف رمضان محمد قائلاً:"قدمت خلال الفترة الأخيرة أكتر من تجربة مختلفة، منها (سيبه يا قلبي) مع محمد حماقي، و(قصة حب) مع رامي صبري، إلى جانب أغنيات سنجل مع أبو، و(يا ألف أهلا) مع أحمد جمال، و(يلا يا ليالي) مع ساندي، وكل تجربة منهم كانت مختلفة بالنسبة لي".
وتابع رمضان محمد حديثه قائلاً:"لما بعت الأغنية لرامي عجبتُه جدًا في البداية، لكنه رجع تردد لأنه كان متعود على لون غنائي معين، فقلت له مفيش مشكلة وممكن نشتغل على حاجة تانية وبعد يومين كلمني وقال لي إنه خلاص حسم قراره، وإن الأغنية دي خلتّه يغير وجهة نظره في الألبوم كله، ويقرر يقدم أغلبه أغاني حب وإيقاعات سريعة بدل الاعتماد على الدراما، ويظهر للجمهور بشكل مختلف".
واستكمل رمضان محمد قائلاً:"أنا كنت شايف إن مفيش مانع أجرب مع رامي لون جديد، والحمد لله الأغنية كانت بداية لتغيير كبير في شكل الألبوم".
واختتم رمضان محمد حديثه قائلًا:"فكرة (وبقيت بحبه) جاءت من إحساس إن الإنسان لما يحب بصدق، بيحب كل حاجة مرتبطة بالشخص اللي بيحبه، سواء الناس القريبة منه أو التفاصيل اللي تخصه، ومن هنا خرجت الفكرة الأساسية للأغنية".
تفاصيل أغنية وبقيت بحبه
وأغنية "وبقيت بحبه" من كلمات رمضان محمد، وألحان علي شعبان، وتوزيع وميكس وماستر وسام عبد المنعم.
