ناقد فني لـ”وشوشة”: رحمة محسن ظاهرة جديدة.. وبوسي ما زالت الأفضل
أكد الناقد الفني أحمد السماحي، أنه يرفض فكرة أن تلغي فنانة أخرى أو تستحوذ على مكانها في الساحة الغنائية، مشيرًا إلى أن لكل مطربة شخصيتها الفنية وجمهورها.
وقال السماحي في تصريح خاص لـ "وشوشة" :"مفيش فنانة بتلغي فنانة، ولا فنانة بتاخد مكان فنانة، رحمة محسن شيء، وبوسي شيء تاني خالص، الاتنين بيقدموا اللون الشعبي، لكن بوسي عندها خبرة أكبر بسنين، وده فارق مهم.”
وأضاف: “بوسي أفضل صوتيًا من رحمة محسن، لأنها عندها مخارج حروف واضحة، وكمان عندها قدرة أفضل إلى حد ما على اختيار الأغاني المناسبة ليها.”
وعن رحمة محسن، أوضح السماحي: “رحمة تعتبر ظاهرة جديدة، ولسه بدري جدًا نحكم عليها، ممكن مع الوقت تستمر وتبقى من أهم نجمات الغناء الشعبي، وممكن الظاهرة دي تتراجع، عشان كده المقارنة دلوقتي مش منصفة.”
وتابع: “أنا شايف إن رحمة لسه قدامها مساحة كبيرة للتطور، لأنها في بداية مشوارها الفني، ومن الطبيعي إن خبرتها تزيد مع الوقت، لكن حاليًا من الصعب جدًا مقارنتها ببوسي.”
واختتم أحمد السماحي تصريحاته بالإشادة بالمطربة بوسي، قائلًا: “بوسي بنت شاطرة جدًا، ولولا الظروف الشخصية اللي مرت بيها، كانت وصلت لمكانة أكبر بكتير. وأنا سبق ونصحتها تتمسك باللون الشعبي، لأن ربنا ميزها فيه، وهي فعلًا تعرف تختار أعمالها.”
وأضاف السماحي عن رحمة محسن: “حتى الآن هي معروفة باللون الشعبي، ولو هتطور نفسها فالأقرب إنها تقدم الشعبي بشكل مودرن، لكن لسه منقدرش نقول إنها وصلت للمرحلة اللي نقارنها فيها ببوسي.”
