ساندي لـ"وشوشة": أغنية يلا يا ليالي خطفتني من أول ما سمعتها وقلت دي بتاعتي
أكدت الفنانة ساندي أنها تتفاءل كثيرًا بأغنيتها الجديدة “يلا يا ليالي”، معربة عن أمنيتها أن تنال إعجاب الجمهور، مشيرة إلى أنها دائمًا تبذل أقصى ما لديها في كل عمل تقدمه، لكن يبقى الحكم النهائي للجمهور. وقالت: “الله أعلم، إحنا بنجتهد وربنا عليه التوفيق”.
وتحدثت ساندي في تصريح خاص لـ"وشوشة" عن كواليس اختيار الأغنية، مؤكدة أنها لم تكن ضمن الخطة في البداية، حيث قالت: “كنت عند محمود صبري بنشتغل على أغنية تانية، وقالي اسمعي دي، فخطفتني، وقولتله إيه ده أنا هغنيها دلوقتي حالًا، عايزة أسمعها بصوتي، وفي نص الغنا قولتله دي بتاعتي خلاص، وفعلاً الغنا اللي غنيته في الجايد وأنا مش حافظه الغنوة أوي هو اللي نزل للجمهور، ما غنيتهاش تاني خوفت الإحساس يتغير”.
وأضافت ساندي أنها لم تُصور كليب للأغنية بسبب رغبتها في طرحها سريعًا، موضحة:"ما صورتش الحقيقة عشان كنت مستعجلة على نزولها، لكن مفيش أي تحديات، أنا بس حبيتها وغنيتها".
وعن تعاونها مع فريق العمل أشادت ساندي بالشاعر رمضان محمد والملحن محمود صبري، قائلة:"رمضان محمد من الشعراء اللي بحبهم أوي، ومحمود صبري أنا وهو عاملين حالة كده فيها تواصل طاقي غير عادي، نجحنا مع بعض في الألبوم اللي فات".
واختتمت ساندي حديثها بالكشف عن الرسالة التي تتمنى أن تصل إلى الجمهور من خلال الأغنية، مؤكدة:"هي الأغنية بسيطة، وحاسة إني عايزة يوصل للجمهور صوتي الهادي الحنين من غير طبقات عالية".
تفاصيل أغنية يلا ياليالي
أغنية (يلا يا ليالي) من كلمات رمضان محمد، وألحان وتوزيع محمود صبري، وهي أغنية درامية مليانة مشاعر ووجع وإحساس عالي جدًا الفكرة بتدور حول بنت فارقت حبيبها ومقدروش يكملوا مع بعض، فبتقعد تحكي لليالي وتحكي وجعها وأحاسيسها.
