هيثم نبيل لـ"وشوشة": التمثيل والغناء يكملان بعضهما.. والجرأة سر خوضي تجارب جديدة
نظمت مجموعة وشوشة الإعلامية ندوة خاصة للمطرب والملحن هيثم نبيل، تحدث خلالها عن كواليس دخوله مجال التمثيل ورؤيته للعلاقة بين الغناء والدراما، كما كشف عن حبه لخوض التجارب المختلفة وعدم التردد في استغلال مواهبه الفنية في أكثر من اتجاه.
وقال هيثم نبيل في تصريح خاص لـ"وشوشة":"مفيش أي عيب إن الفنان يجرب أكتر من مجال، بالعكس الغناء والتمثيل طول عمرهم بيخدموا على بعض لو الفنان أتقن اللي بيعمله إحنا شفنا نجوم كبار زي عبد الحليم حافظ وفريد الأطرش ومحمد عبد الوهاب ومحمد فوزي، وقد إزاي التمثيل ساهم في وصولهم لأجيال مختلفة واستمرار نجاحهم".
وأضاف هيثم نبيل قائلاً:"أنا مؤمن إن أي خطوة فنية ممكن تضيف للفنان طالما بيحضر لها كويس فكرة إن الواحد يخاف من التصنيف أو من آراء الناس ممكن تحرمه من نجاحات كبيرة لو التمثيل هيخدم على الغناء ويضيف ليه، فدي حاجة إيجابية جدًا، وده حصل مع نجوم كتير قبل كده".
وتابع هيثم نبيل حديثه قائلاً:"أنا شخص جريء وبحب المغامرة الفنية، وعشان كده كتبت فيلم قصة وحوار وسيناريو عيسى، وهو من بطولة مينا مسعود ويشارك فيه الفنان الكبير خالد الصاوي وعدد من النجوم لو كنت خايف من خوض التجربة أو مقتنع إنها مش مجالي، ماكنتش هعملها من الأساس".
هيثم نبيل عن توظيف الامكانيات وتطويرها
واختتم هيثم نبيل حديثه قائلًا:"بحب أوظف كل الإمكانيات اللي عندي وأستفيد منها، لأن الفنان لازم يجرب ويطور نفسه باستمرار. إحنا مش هنعيش أكتر من مرة، وعشان كده لازم نستغل كل فرصة نقدر نحقق من خلالها حاجة نحبها وننجح فيها".
