يحيى حمزة يكشف لـ"وشوشة" سر فكرة مسلسل "المصيدة"
يستعد المؤلف يحيى حمزة لتقديم مسلسله الجديد “المصيدة” خلال موسم رمضان 2026، حيث يكشف العمل عن جوانب من الاحتيال الإلكتروني والنصب باستخدام الهواتف المحمولة بطريقة درامية كوميدية.
كشف المؤلف يحيى حمزة في تصريح خاص لـ”وشوشة” عن فكرة مسلسله الجديد "المصيدة"، قائلاً: “فكرة المسلسل جات من الواقع ومواقف أنا شوفتها، ومن أهم الحاجات اللي بتتكلم عنها المصيدة هي النصب الإلكتروني والاحتيال واستخدام الموبيلات بشكل خاطئ. المصيدة اسم معبر عن موضوع المصايد اللي حوالينا واللي ممكن أي حد يقع فيها الفكرة الأساسية إن ممكن حد تم الاحتيال عليه باستخدام موبايله الشخصي، ومن هنا جات الفكرة”.
وأضاف المؤلف يحيى حمزة: “في أكتر من قضية بيناقشها المسلسل طبعا، بس أكتر حاجة هو الاحتيال والنصب الإلكتروني بشكل غير مباشر، إحنا بنقدم دراما كوميديا”.
وأوضح المؤلف أن “الفكرة بتفرض نفسها والطرح هو اللي بيختلف. الفكرة إزاي عايز تقدم المعلومة، بتشوف أبسط الطرق اللي توصل المعلومة بتاعتك، بس في وسط الكوميديا والدراما أنت بتقدمها”.
وحول عدد الحلقات، قال: “فكرة نكتب 15 حلقة أو 30 ملهاش مقياس. الفكرة اللي بتطرح نفسها ودايمًا الفكرة هي اللي بتشتغل. الفكرة تستحمل إنها تبقى 30 وما يبقاش فيها مط. بنكتبها 30 لو هي 15، وبنوصل المعلومة سريع يبقى 15 لو عملنا 30 يبقى الإيقاع مش حلو الأحداث هي اللي بتحدد مسار الحلقات أول ما اشتغلنا عليه كانوا شايفين 15 حلقة هتبقى حلوة جدًا، ربما تبقى في فكرة تانية تستحمل 30 حلقة”.
وعن المنافسة الرمضانية، أضاف المؤلف يحيى حمزة : “المنافسة في رمضان صعبة جدًا، بس كل ما يبقى في صعوبة في المنافسة يبقى في إمتاع أكتر، وطبعا دا بيهم بالفائدة للمشاهد وبيبقى المطروح في السوق أكتر. المنافسة مع أساتذة كبار طبعا، هي منافسة ممتعة وشوف انت متواجد فين في السوق”.