ياسمينا العبد عن نجاح "ميدتيرم": "مش قادرة أصدق اللي حصل وممتنة للجمهور"

تحدثت الفنانة الشابة ياسمينا العبد عن ردود أفعال الجمهور والنجاح الكبير الذي حققه مسلسل "ميدتيرم"، حيث تمكن المسلسل من تخطي حاجز المليار مشاهدة منذ عرضه.

وخلال السطور التالية، ينقل لكم موقع وشوشة أبرز تصريحات الفنانة الشابة ياسمين العبد لبرنامج "ET بالعربي"، حول مسلسلها الجديد “ميدتيرم”.
 

ياسمينا العبد: فخورة وممتنة بالنجاح

قالت ياسمينا العبد: "والله أنا مبسوطة أوي، وفخورة وممتنة، ومش قادرة أصدق، والنهارده آخر حلقة بتتذاع، وبيعملوا عرض خاص للحلقة الأخيرة في القاهرة، بس أنا ما قدرتش أكون معاهم، لكني مبسوطة جدًا جدًا بالنجاح اللي حققه المسلسل".

نجاح أعمال شبابية للمرة الأولى

وتابعت: "أنا ما كنتش أتوقع ده خالص، إن أعمال شبابي بالشكل ده ومختلفة كده تنجح كل النجاح ده، خصوصًا إن دي أول مرة شباب يشيلوا مشروع زي ده ويحصل كده. الحمد لله".

مناقشة قضايا الشباب بلا تزييف

وأوضحت الفنانة الشابة ياسمين العبد أن أكثر ما كان فريق العمل مهتمًا به هو تناول مشاكل الشباب بشكل واضح وصادق دون تزييف، وقالت: "ده مهم جدًا، وإحنا بنشوف حاجات كتير مؤخرًا خلت في أولوية أكبر إن إحنا نتكلم عن الشباب".

أصعب المشاهد انهيار "تيا"

وفي سياق متصل، كشفت النجمة الشابة ياسمينا العبد عن أصعب المشاهد التي واجهتها خلال تصوير المسلسل، قائلة: "مشهد في الحلقة 29 لما كانت بتشخبط على البورد اللي هي عملتها وهي بتعيط، لأن شخصية تيا بتتأثر في أوقات كتير، لكن في الـ30 حلقة مش بنشوف، مش هقول العياط، لا، الانهيار ده أو قد إيه هي تعبت، لأن الناس يمكن مش شايفة إن ده مرض، هي مش شريرة، هي مريضة، يمكن الفعل شرير، لكن في الأول وفي الآخر هو جاي من مرض، ومهم أوي نركز في الصحة النفسية ومنتجاهلهاش".