عمرو يوسف يكشف كواليس الأبوة:حياة بتغير علي من أمها
تحدث الفنان عمرو يوسف عن علاقته بابنته حياة، مؤكدًا أنها تغار عليه بشدة، ليس فقط من الجميع، بل حتى من والدتها الفنانة كندة علوش.
وخلال السطور التالية، يرصد لكم موقع “وشوشة” أبرز تصريحات عمرو يوسف خلال استضافته في برنامج "عندك وقت مع عبلة" مع الإعلامية عبلة، والمذاع عبر شاشة “MBC مصر”.
"البنت حبيبة أبوها"
قال عمرو يوسف: "البنت حبيبة أبوها أكتر من الولد، وحياة بتغير علي أكتر، وكمان بتغير علي من أمها".
وأضاف، في حديثه عن علاقته بابنته: "حياة عندها إحساس عالي بالغيرة عليا، وده بيبين قد إيه العلاقة بينا قوية ومختلفة".
"أجمل إحساس في حياتي لما أقضي وقت مع عيلتي"
وأشار عمرو يوسف إلى أن أسعد لحظات حياته هي التي يقضيها مع أسرته، قائلًا: "أجمل إحساس بقضيه في حياتي هو لما أقضي وقت مع عيلتي".
وتابع: "أنا اتغيرت جدًا من بعد ما بقى عندي عيال، وبقيت حاسس بالمسؤولية أكتر، والإحساس ده فرق معايا في كل حاجة".
"مكنتش شايف نفسي أب قبل ما أعيش التجربة"
وأكد عمرو يوسف أنه لم يكن يتخيل نفسه في دور الأب قبل أن يعيشه فعليًا، موضحًا: "أنا مكنتش شايف نفسي في دور الأب قبل ما أبقى أب".
وأضاف: "أنا شايف إن الأمومة غريزة، لكن الأبوة تعود ومسؤولية، وده شيء ما كنتش متخيله غير لما عيشته".
"لما حياة تطلب مني ما أروحش الشغل بزعل جدًا"
وفي سياق متصل، تحدث عمرو يوسف عن أكثر المواقف التي تؤثر فيه نفسيًا، قائلًا: "أكتر حاجة بتأثر فيا لما أكون رايح الشغل وتطلب مني حياة ما أروحش، وأفضل معاها".
وأضاف متأثرًا: "دي أكتر حاجة بتضايقني جدًا، ببقى رايح الشغل وأنا زعلان".
"بقى عندي حنية ما كانتش عندي قبل كده"
وأوضح النجم أن الأبوة غيرت شخصيته بشكل كبير، قائلًا: "بقى عندي حنية ما كانتش عندي قبل كده، ومش مصدق أصلًا إن أنا بقول الكلام ده".
"بحافظ على التوازن بين شغلي وعيلتي"
كما كشف عمرو يوسف أنه يحرص دائمًا على التوازن بين حياته المهنية والأسرية، مؤكدًا: "في الأوقات اللي ما بكونش مشغول فيها بتصوير أعمال فنية، بفضل أقضي كل وقتي مع عيلتي".
وأضاف: "بحاول دايمًا أحافظ على توازن العلاقة بين شغلي وبين زوجتي وأولادي، لأن العيلة هي الأساس".