فرح الزاهد: سعيدة بتكريمي عن شخصية “سعاد”.. وهذه رسالتي لكل امرأة

عبرت الفنانة الشابة فرح الزاهد عن سعادتها بتكريمها في مهرجان التميز والإبداع عن مسلسل لينك ودورها “سعاد”.
 

وخلال السطور التالية ينقل لكم موقع وشوشة أبرز تصريحاتها لبرنامج "وان تيك" على هامش حضورها فعاليات المهرجان.

قالت الفنانة فرح الزاهد:"أنا سعيدة جدًا بتكريم مهرجان التميز والإبداع، لأنه جاي عن مسلسل لينك ودور سعاد، لأن الحمد لله الناس حبت الدور وتعاطفوا معاه جدًا، لأنها كانت بتناقش العنف النفسي ضد المرأة. وده لستات كتير واجهته في العالم، وده اللي خلاهم يحسّوا بيها ويتعاطفوا معاها."

"سعاد" ليست ضحية بالكامل

وأضافت:"الناس تعاطفوا مع سعاد جدًا، بس هي برضه مش ضحية، لأنها غلطت إنها كانت بتتنازل عن كل حاجة، وبتاخد دور الراجل والست، وده مش صح. عشان كده لازم الستات يتعلموا إن مش كل حاجة يقدروا يتصرفوا فيها، ولا كل تضحية صح، ولا أي حاجة بتزيد عن حدها بتتقلب."

وتابعت:"حلو إن الناس تتعاطف معاها، بس مش لازم يبقوا زيها، لأنها مش طيبة… هي هبلة إنها كانت بتدي 100%، وده مش صح.
لازم تحافظي على طاقة الأنوثة كمان."

تعليقات الجمهور: “سعاد” عاشت بداخلنا

وأعربت فرح الزاهد عن سعادتها الكبيرة بتفاعل الجمهور على مواقع التواصل الاجتماعي قائلة:"أنا في تعليقات كتير جدًا جت، وبجد مبسوطة جدًا، وبشكر ربنا كل يوم على الكومنتات. 
الناس حسسوني إن اللي بيطلع من القلب بيوصل للقلب، وأنا فعلًا كنت بقدم دور سعاد من قلبي، وكنت عايزة أوصل كل المشاعر دي."

وأضافت:"في كومنت واحدة قالت لي انت خليكي سعاد، ما تبقيش مجرد شخصية.. إنتِ خليتيها تعيش جوانا وتبقى موجودة قدامنا في كل خطوة هناخدها ونتعلم منها... وده أكتر شيء فرحني."

شخصية حقيقية.. ومسؤولية مضاعفة

وكشفت الفنانة الشابة فرح الزاهد أن شخصية "سعاد" التي قدمتها في مسلسل لينك حقيقية وليست من وحي الخيال.
وقالت:"هي قصة حقيقية، وأنا عرفت ده في البروفة، وبعدها شفتها وقعدت معاها، عشان كده كنت متحملة مسؤولية إني أوصل كل حاجة وكل إحساس للمشاهدين."

رسالة فرح الزاهد للنساء

واختتمت حديثها برسالة واضحة لكل امرأة:"أهم رسالة كنت عايزة أوصلها للست إن لو جوزك خانِك ده مش معناه إنك السبب...ممكن تكوني مهتمة بنفسك جدًا… بس المشكلة فيه هو."