حكيم كمال يكشف لـ”وشوشة” كواليس أغنية “قررنا نحن الآتي” لأكرم حسني
تحدث الشاعر حكيم كمال عن كواليس كتابته لأغنية “قررنا نحن الآتي” التي يغنيها النجم أكرم حسني، مؤكدًا أن الفكرة بدأت من رغبة فريق العمل في تقديم أغنية تتناول مفهوم السعادة بشكل مختلف وغير تقليدي.
وقال حكيم كمال في تصريح خاص لـ"وشوشة":"كنا بنتكلم في البداية مع فريق شارمُر إننا عايزين نعمل أغنية عن السعادة، بس مش السعادة العادية.. السعادة اللي نابعة من قرار، إنك تفرح رغم كل حاجة بتحصل حواليك، ومن هنا طلعت فكرة (قررنا نحن الآتي)”.
وأوضح حكيم كمال أن اسم الأغنية كان نقطة الانطلاق الحقيقية، قائلًا:"بدأنا بالعنوان واشتغلنا عليه أنا ومنة عدلي القيعي، وقررنا نخلي الأغنية تحكي عن مواقف بتحصل في حياتنا، لكن نتعامل معاها بروح خفيفة ونضحك عليها الهدف إن الناس تسمعها وتبتسم”.
وأضاف:"أكرم حسني من أكتر الفنانين اللي بحب أشتغل معاهم، خفة دمه وروحه بتفرق في أي مشروع، وبيحب يضيف لمسة خاصة، فخور إن الأغنية دي فيها صوته وروحه”.
كما تحدث عن التعاون مع الكاتبة منة عدلي القيعي، فقال:"منة مش بس كاتبة موهوبة، دي أختي وصديقتي وأكتر مكسب في حياتي، شكرًا لها على دعمها الدائم وثقتها اللي بتخليني أشتغل من قلبي".
وحول التحديات التي واجهته أثناء كتابة الأغنية، أشار إلى أن “أكبر تحدي كان إننا نتكلم عن السعادة من زاوية جديدة، لأن كتير اتكلموا عنها، فكان لازم نقدم حاجة مش مكررة".
واختتم حديثه قائلًا: "مفيش مشاريع جديدة حاليًا مع أكرم، لكن أتمنى إن التعاون يتكرر قريبًا لأن الشغل معاه ممتع وبيطلع منه حاجة مبهجة فعلًا".