كريم العمري: أجسد شخصية شاب مكافح في “قهوة 2”.. والعمل تجربة مختلفة

أعرب الفنان كريم العمري عن سعادته الكبيرة بالمشاركة في مسلسل "اتنين قهوة"والذي من المقرر أن يُعرض  المسلسل خلال الفترة المقبلة، مؤكدًا أن الشخصية التي يقدمها تحمل طابعًا إنسانيًا مختلفًا ومليئًا بالمفاجآت.

وقال كريم العمري في تصريح خاص عبر "وشوشة" :"أجسد في المسلسل شخصية "فؤاد"، وهو شاب ظريف جدًا، طيب، مش مؤذي، بيحب الخير للناس كلها، ودمه خفيف أوي".

وتابع حديثه قائلاً:"الشخصية نموذج للشاب المكافح والمخلص اللي بيتعب في حياته عشان يوصل، وده باين جدًا من خلال تطور الأحداث، وإن شاء الله الشخصية تعجب الناس لأنها مختلفة وقريبة من القلب".

وأضاف:"صورت حتى الآن حوالي ٧٠٪ من مشاهدي، والتصوير ما زال مستمر، وإن شاء الله نخلص قريب".

وعن أسباب حماسه للدور، تحدث:"اللي شجعني في البداية هو إن المسلسل من تأليف الأستاذ عمرو محمود ياسين، واللي كلنا عارفين قد إيه كتاباته مهمة ومؤثرة، بالإضافة لإنتاج الأستاذ أحمد عبد العاطي، والمخرج الكبير الأستاذ عصام نصار، اللي فعلاً بيركز في كل تفصيلة صغيرة، وبيخلق جو احترافي ومريح جدًا".

وتابع:"الدور نفسه كمان مختلف تمامًا، أول مرة أقدمه، وكان تحدي حقيقي بالنسبالي، وده خلاني أتحمس له من أول لحظة. بجانب كده، الشغل مع مرام علي وأحمد فهمي وباقي الزملاء زي حازم إيهاب ونانسي صلاح كان من أكتر الحاجات اللي حمستني.. كاست جميل ومحترم، وكلنا بقينا شبه عيلة".

وعن تعاونه مع صناع العمل، قال كريم:"التعاون مع أستاذ عمرو محمود ياسين له طابع خاص جدًا، لأنه هو أول من قدمني واكتشفني، وله فضل كبير عليا في بدايتي. هو بيهتم بأدق التفاصيل حتى في أقل حرف في الحوار، وده بيخلي الشغل معاه ممتع جدًا أما المخرج أستاذ عصام نصار، فبصراحة بيهتم بكل عنصر في اللوكيشن وبيصنع حالة جميلة وهادية بين الكل".

وعن أبطال العمل، أضاف:"مرام ممثلة شاطرة وبسيطة جدًا، وكل الناس بتحبها، وبتعامل الكل بتواضع واحترام، وأحمد فهمي إنسان لذيذ وطيب جدًا، واتعلمت منه ومن مرام حاجات كتير".

وأستكمل:"أما عن نانسي صلاح وحازم إيهاب فهما من أقرب أصدقائي فعلًا، وبنشوف بعض برا التصوير، فحسيت إننا في بيتنا وسط ناسنا".

واختتم كريم العمري حديثه برسالة مؤثرة لفريق العمل، قائلًا:"أنا متحمس إن الناس تشوف المسلسل، لكن في نفس الوقت، حاسس إني هفتقدهم جدًا بعد انتهاء التصوير. إحنا بقينا عيلة بجد، وبتمنى إننا نشتغل مع بعض تاني قريب لأن فعلاً هيوحشوني جدًا".

أبطال مسلسل قهوة 2

والمسلسل من بطولة أحمد فهمي ومرام علي ومحسن محيي الدين، ويتكون من 30 حلقة. والعمل من تأليف عمرو محمود ياسين، ومن إخراج عصام نصار، ومن إنتاج أحمد عبد العاطي، ويعد هذا هو العمل المصري الثاني للفنانة السورية مرام علي بعد مشاركتها في مسلسل الحصان الأسود الذي كان من بطولة أحمد السقا وشيري عادي وياسمين صبري.