أبرز تصريحات صلاح عبدالله: النقاب مش من قناعاتي.. وتمثيلي مع حلمي وكريم أمنية مؤجلة
أدلى الفنان صلاح عبدالله بعدد من التصريحات المؤثرة خلال ظهوره الإعلامي في برنامج “حبر سري”، حيث كشف عن أمنيته في العمل مع النجمين أحمد حلمي وكريم عبدالعزيز، قائلا: "نفسي أمثل معاهم، وحظي قليل إني ما اشتغلتش معاهم حتى وهما صغيرين، مع إني مثلت مع كتير من النجوم وهم لسه في بدايتهم، وبقوا دلوقتي سوبر ستار وميجا ستار".
وخلال ظهوره ببرنامج "حبر سري" أضاف مازحًا: "دلوقتي بعد التصريح ده، لو جاتلي عروض معاهم هاعتذر، لأن عمري ما قلت قبل كده إني نفسي أمثل مع حد، وأنا بحبهم جدًا، بس يمكن هما ميحبونيش، وده وارد".
كما تحدث صلاح عبدالله عن موقف شخصي مؤلم تعرض فيه للنصب، وقال: "اتنصب علي من شخص ما كنتش متوقع منه كده، وأكتر ناس خدعوني كانوا ناس مش معروفين، وأهلي دايمًا بينبهوني إني مقولش كل حاجة".
وتابع: "عدّى وقت طويل، وفجأة قريت خبر وفاته، وقضيت ليلة صعبة جدًا، كنت ساكن في شقة، وفتحت شباك أوضتي وكلمت ربنا، بحاول أقنعه إنه مكنش نصب عليا، وإن الغلط مني أنا، ودعيتله، هو مات صغير، وأنا عندي يقين إن ربنا تقبّل دعائي".
وفي تصريحات أخرى، أبدى عبدالله رفضه لفكرة النقاب قائلا: "أنا مع الحجاب والاحتشام، لكن مش مع النقاب، ولو بنتي طلبت تتنقّب هرفض، وهحاول أقنعها، لكن لو أصرت مش همنعها، أنا مؤمن بالحرية".
برامج المقالب
وعن برامج المقالب، قال: "شاركت زمان في مقالب كانت خفيفة، لكن دلوقتي لا، رامز ده ابني، والمقالب دي سبوبة حلوة، بس مقدرش أشارك فيها، كنت أتمنى، بس مش مكاني دلوقتي".