سهير جودة ومفيدة شيحة تناقشان تربية الفتيات في المجتمع
ناقشت الإعلاميتان سهير جودة ومفيدة شيحة طريقة تربية الفتيات في المجتمع المصري، وطرحتا تساؤلًا حول ما إذا كان الأفضل تربية البنت على أنها "بـ100 راجل" أم "تُعامل كأنها ملكة".
وأعربت مفيدة شيحة خلال برنامج "الستات" المذاع على قناة النهار، اليوم الأربعاء، عن وجهة نظرها في تربية ابنتها قائلة: "أنا شايفة إن البنت مش لازم لما نقول إنها بمئة راجل يبقى معناها فقدت شيء من أنوثتها أو إنها مش هتبقى ملكة، إحنا في مجتمع بيحب يحط أسامي كتير، لكن الست اللي بمليون راجل دي قادرة تصمد، وتبقى قد المسؤولية، وتعرف تصرف على نفسها وقت الحاجة، وده شيء كل أم تتمنى تشوفه في بنتها".
ومن جانبها، قالت الإعلامية سهير جودة: "إحنا محتاجين نغير كلمة 100 راجل ونقول 100 ست، لأن في ستات شايفة إن فكرة الهانم اللي بتتدلع طول الوقت، وتقول أنا ما بعرفش وما اقدرش، بتخليها دايمًا في احتياج للراجل، لكن لو ما لقيناش الراجل الصح، ما ينفعش نسيب الحياة توقف".
واختتمت سهير حديثها بالتأكيد على ضرورة تربية الفتاة على الاستقلال والاعتماد على النفس، قائلة: "لازم نربي بنتنا إنها تعتمد على نفسها، وتحقق ذاتها، وتكون مش محتاجة لحد، حتى لو كان جوزها. وده مش معناه إنها هتبقى ند ليه، لكن معناها إنها كاملة في ذاتها".