عفاف مصطفى لـ"وشوشة": "الدشاش" بلع كل الأفلام اللي جمبه واكتسح السوق

أعربت الفنانة عفاف مصطفى، إحدى أبطال فيلم الدشاش، عن رأيها في ردود أفعال الجمهور حول الفيلم، مشيرة إلى أنه حقق نجاحًا كبيرًا فور عرضه بالسينمات.

وفي تصريحات خاصة لـ"وشوشة"، قالت عفاف مصطفى: “الفيلم اكتسح السوق كله وبلع كل الأفلام الموجودة؛ لأنه فيلم معمول 10 على 10”.

وتابعت: "فيه مجهود وفيه تركيز وإخلاص وتفاني من المخرج وجميع الممثلين وجميع الفنيين من أصغر فني لأكبر فني، في حب وتضافر لعمل شئ يرجع للجمهور بالفائدة".

أكدت عفاف مصطفى أن فيلم “الدشاش” حقق أعلى إيرادات في جميع دور العرض السينمائية، قائلة: "الفيلم كسر الدنيا وعمل أعلى إيرادات في جميع شبابيك التذاكر في مصر، قرايبي راحوا يتفرجوا في سينما لم يجدوا كراسي واستنوا الحفلة اللي بعدها، الفيلم مكسر الدنيا بشكل لا يخطر على البال أبدًا".

وعن تغيير محمد سعد لجلده في العمل، قالت: “الفيلم نجح لأن محمد سعد غير جلده المرة دي وعمل شغل معملهوش قبل كده في أي فيلم من أفلامه، وركن على جنب كل الأفلام اللي عملها على الرغم من أنها كانت افلام جميلة وعجبت الجمهور وكانت بتضيف لنا السعادة والضحك”.

واختتمت: "سعد حب يغير الشخصيات اللي بيعملها لحاجة أكشن بجانب فيها كوميديا مواقف وفيها تراچيديا".