مروة صبري تهاجم هاجر الشرنوبي: صورتك مع ابنك مُهينة وميصحش تبوسيه كدة
انتقدت الإعلامية مروة صبري، الفنانة هاجر الشرنوبي؛ بسبب الصورة التي نشرتها الأخيرة بالأيام الماضية، وهي تُقبل نجلها في عيد ميلاده، بطريقة اعتبرها البعض جريئة، مؤكدين أنه لا يجوز للأم أن تُقبل نجلها بهذه الطريقة.
قالت مروة خلال إحدى حلقات برنامجها “قعدة ستات"، إن هاجر الشرنوبي، فنانة شابة قامت بأدوار جميلة ولا تبحث عن التريندات، ولكن الصورة التي نشرتها مؤخرًا احتفالًا بعيد ميلاد نجلها لا تليق.
وتابعت: أنا الصراحة مش عارفة أعلق أقول إيه، هي الفنانة كانت بتبوس ابنها في الصورة.. أيه المشكلة لما تبوس ابنها؟!.. تبوس ابنها تحضن ابنها تغرق ابنها حب، ولكن صورة بالمنظر دة ما ينفعش وما يصحش أنك تتصوريها مع ابنك.
وأضافت: الصراحة صورة استفزت الناس بشكل كبير ولأول مرة أنا ابقى واقفة مع السوشيال ميديا، ما يصحش تبوسي ابنك بالشكل ده في الأول والآخر ده راجل حتى لو عنده 13 سنة، بيروح المدرسة وبيشوف زمايله هناك، أنا ماشوفتش أم بتبوس ابنها بالشكل ده الصراحة، سواء راجل أو بنت ما ينفعش نبوسه كده، والناس اللي انتقدتك مش مريضة هو أنت اللي غلط.
وأردفت: ما يصحش إنك تبوسي ابنك بالشكل ده، مين قال إن الأم بتبوس ابنها بالشكل ده، ولو اتصورتي مع ابنك وعايزه تنزلي له صورة، وشوفتي صورة ما يصحش أنك تنزليها بتسىء ليكي ولابنك نزلتيها ليه؟.
واستطردت: إيه اللي خلاكي تنزليها؟، أنتي منزلاها للعالم كله هيشوفها، ومتضايقة إن الناس بتنتقدك؟!، لا الناس عندها حق لأن ما يصحش أنك تعملي ده أبدًا، ابنك كلها كام سنة وهيكبر وما يصحش أنك تبوسيه بالشكل ده، صورة مهينة ليكي وليه، الانتقادات كان فيها حق كبير جدًا.
يذكر أن هاجر الشرنوبي كانت قد نشرت صورة وهي تحتفل بعيد ميلاد نجلها، ونشرت عددًا من الصور بينها واحدة ظهرت فيها وهي تقبله من فمه، ما عرضها لانتقادات واسعة من قبل الجمهور.