يوسف عمر : شعرت بالخوف من دوري في "مين يصدق" لهذا السبب
استضاف يوسف التهامي وفانا إمام في حلقة اليوم من برنامج "عيش صباحك" على "نجوم إف.إم"، الفنان يوسف عمر للحديث عن أحدث أعماله فيلم "مين يصدق".
وعن شخصية "باسم" التي قدمها في فيلم "مين يصدق"، كشف الفنان يوسف عمر تخوفه في البداية من تقديم دور البطولة وكذلك تفاصيل الشخصية التي كانت جديدة عليه، وقال: "كنت خايف وعندي أسئلة كتيرة وفكرة بطولة فيلم ده كان مخاطرة كبيرة أوي وقعدت مع زينة عبد الباقي المخرجة واتناقشنا في حاجات كتيرة واتفقنا بسرعة بعد ما اتطمنت وحبيت الفكرة علشان مختلفة ودور بعيد عني أوي عمري ما عملت ده قبل كده، وكانت المخاطرة هل هقدر أعمل بطولة فيلم في الوقت ده؟ وخصوصا إن الدور صعب وبعيد عني أوي ومحتاج شغل كتير أوي، وإحنا كلنا كنا بناخد مخاطرة ودي كانت أحسن حاجة لأننا كنا عاوزين نعمل أحسن حاجة".
وتابع: "الشخصية هو ولد ميكانيكي من إسكندرية واتسجن وخرج ومش لاقي ياكل واتضطر ينصب على ناس علشان يلاقي فلوس وفي نفس الوقت طيب وبيحب أهل منطقته وبيساعدهم وقعدنا شوية نبني تاريخه سوا مع جايدا وزينة عبد الباقي وكانت رحلة ممتعة، وقعدنا نفكر في شكله ولونه لأن لوني ما كانش كده في الفيلم فقعدت قبل الفيلم بشهرين بقعد كل يوم في الشمس لأنه شغال طول النهار فمستحيل لونه هيبقى عادي»، مضيفًا: «في فترة التحضير حاولت أبقى موجود في الشارع أكتر علشان أشوف نماذج مشابهة وفيه كذا شخصية خدت منهم تفاصيل للدور".
وأكد أنه شعر بالثقة والضغط معا في وجود أساتذة كبار مشاركين في العمل مثل أشرف عبد الباقي وشريف منير وأحمد رزق وعارفة عبد الرسول، قائلا: "وجود الأساتذة الكبار إدانا طاقة إيجابية إنهم أدونا الثقة واشتغلوا معانا، لما يكون فيه أستاذ كبير وافق يشتغل معايا ده ضغط لكنه في نفس الوقت ثقة منه لأنه أكيد وافق بعد ما قرأ القصة كويس".