منة عبدالرحمن لـ"وشوشة": التلفزيون لا يزال قادرًا على التأثير في الأجيال الجديدة
بمناسبة اليوم العالمي للتليفزيون، الذي يوافق 21 نوفمبر من كل عام، يظل التليفزيون أحد أبرز وسائل الإعلام التي نجحت على مدار سنوات طويلة في التأثير على الجمهور وتشكيل وعيه، رغم التطور الكبير الذي شهدته وسائل الإعلام وظهور المنصات الرقمية.
وقالت الإعلامية منة عبدالرحمن في تصريح خاص لـ"وشوشة": "أنا شايفة إن التلفزيون، رغم كل التطور التكنولوجي وظهور المنصات الرقمية، لسه ليه دور مهم جدًا، لأنه مش مجرد وسيلة لنقل الأخبار أو تقديم المحتوى، لكنه كمان بيقدر يصنع وعي، ويقدم محتوى موثوق، ويجمع الناس حوالين قضايا وموضوعات تهم المجتمع".
وأضافت: "وفي رأيي، قوة التلفزيون الحقيقية مش بس في الصورة أو الانتشار، لكن في المصداقية والقدرة على التواصل الإنساني مع الجمهور وأعتقد إن التحدي دلوقتي مش إن التلفزيون ينافس المنصات الرقمية، لكن إنه يواكب تطورها ويستفيد منها، مع الحفاظ على هويته ورسالته الإعلامية".
وأشارت إلى تأثير التطور التكنولوجي والذكاء الاصطناعي على مجال الإعلام، قائلة: "خصوصًا إننا بقينا في مرحلة التطور فيها سريع جدًا، والذكاء الاصطناعي بقى ليه تأثير كبير على مجال الإعلام، سواء في طريقة صناعة المحتوى وتقديمه أو سرعة انتشار المعلومات، وده بيخلي مسؤولية الإعلام في التأكد من صحة المعلومات ومصداقيتها أكبر من أي وقت فات".
وتابعت: "ومن الحاجات اللي أنا نفسي أشوفها إن الأجيال اللي في سني ترجع تهتم بالتلفزيون وتكون حريصة إنها تتفرج عليه، لأن مش معنى إننا بقينا بنعتمد بشكل كبير على السوشيال ميديا والمنصات الرقمية إن التلفزيون فقد أهميته أو قدرته على التأثير".
وأوضحت أن هذا التوجه تحرص عليه مع زملائها من خلال برنامج "أنا وهو وهي" على قناة صدى البلد، قائلة: "وده من الحاجات اللي أنا بحرص عليها أنا وزملائي في تقديم برنامج "أنا وهو وهي" على قناة صدى البلد، إننا نقدم موضوعات تهم مختلف الأجيال، وبالأخص جيل زد، اللي أنا واحدة منه، ونناقش القضايا والاهتمامات اللي قريبة منهم وبتلمس حياتهم اليومية، بطريقة تجمع بين المعلومة والترفيه، وتخليهم حاسين إن التلفزيون قريب منهم وبيعبر عنهم وبيسمعهم".
وأكدت: "في النهاية، أنا مؤمنة إن التكنولوجيا مهما اتطورت والوسائل مهما اتغيرت، هيفضل فيه احتياج لإعلام عنده مصداقية وبيحترم عقل الجمهور لأن رسالة الإعلام الحقيقية عمرها ما بتتغير، وهي إنه يكون صوت للناس، وينقل الحقيقة، ويساهم في تشكيل وعي أجيال كاملة".
واختتمت: "نفسي التلفزيون يفضل جزء من حياة الأجيال الجديدة، مش لمجرد إنه وسيلة إعلامية اتعودنا عليها، لكن لأنه يقدر يقدم لهم محتوى حقيقي يضيف لهم ويكون له تأثير في حياتهم لأن الإعلام مش بس بيحكي لنا اللي بيحصل، لكنه كمان بيساهم في تشكيل الطريقة اللي بنفهم بيها العالم والأحداث اللي حوالينا".