إنعام محمد علي تكشف كواليس تصوير فيلم الطريق إلى إيلات

كشفت المخرجة إنعام محمد علي، مخرجة فيلم "الطريق إلى إيلات"، كواليس التحضير وتصوير الفيلم، الذي تناول واحدة من أبرز العمليات التي نفذتها الضفادع البشرية المصرية، مؤكدة أنها استغرقت نحو 3 سنوات من العمل قبل عرض الفيلم، وواجهت خلال تلك الفترة حالة من القلق والخوف بسبب كونها أول امرأة تقدم على إخراج فيلم حربي

وجاء ذلك خلال مداخلة هاتفية مع الإعلامية نهال طايل، في برنامج "تفاصيل" المذاع عبر قناة صدى البلد، بالتزامن مع الاحتفال بذكرى انتصارات أكتوبر

وقالت إنعام محمد علي عن ذكريات الانتصار: "كان بنعتبر الانتصار حلم من الأحلام، إحنا كأننا ولدنا من جديد بالانتصار العظيم"
 

إنعام محمد علي: استغرق مني 3 سنوات قبل عرضه

وتحدثت المخرجة إنعام محمد علي عن فترة التحضير لفيلم "الطريق إلى إيلات"، قائلة: " الفيلم استغرق مني تقريبًا ثلاث سنين شغل قبل عرضه، لما أنا وافقت إن انا اخرجة، لأن أنا كنت متخوفة جدًا كنت أول امرأة تخرج فيلم حربي"

وأضافت: "في الثلاث سنين دول كنت ببني إصراري، ولازم نطلع الفيلم بالشكل على درجة عالية من التصديق، لان الفيلم كان واخد شكل الوثائقي"

وتابعت: "الفيلم عشان يطلع فيلم ناجح لازم يبدو ك عملية حقيقية، لازم درجة المصداقية و التصديق يبقى عالية جدًا، الناس تصدق إن الممثلين دول هم الضفادع البشرية الحقيقية، يبقى يعني تصادم بين الضفادع البشرية الحقيقية وبين الممثلين"

إنعام محمد علي: الضفادع البشرية كانوا متطوعين بدون مقابل مادي

وكشفت إنعام محمد علي أن فريق العمل استعان بالضفادع البشرية الحقيقية خلال التحضير للفيلم، قائلة: "هما الحقيقة امتلأت بحماسهم، وبطريقة كلامهم لما كنت بوجه لهم أسئلة، كأنهم عملوا العملية من أسبوع واحد، يعني العملية اتسجلت داخل عقولهم يعني، والغاية النهاردة يعني عايشين فيها"

وأضافت: "وكان وأنا لما قلت لهم: بتعملوا في ده إيه؟ يعني أي فرد منكم هيروح ممكن ما يرجعش، لقيت ابتسامات بريئة على وشهم"

وتابعت: "وقالوا لي  إحنا كنا نتسابق عشان ننجح في الامتحان اللي كان معمول لنا، يعني كان قبل العملية لازم الفريق اللي هو ترشح ليها لازم يمر باختبارات عشان نضمن نجاح العملية"

وأوضحت: "ولدرجة لو حد فينا فشل في الامتحان يصر إنه يعيد الامتحان مرة أخرى، ويصر إنه هيعمل العملية، هيعمل العملية لأن هذه العملية فخر كبير لينا"

واستكملت: "وكانوا متطوعين بدون مقابل مادي، التطوع إن كأن أرواحهم اللي حطوها على كتفهم تهون عليهم في سبيل الرسالة اللي هيعملوها، لأن الرسالة ما كانتش قليلة، لأن إحنا كلنا كنا ممتلئين بالرغبة في النصر"

مخرجة الطريق إلى إيلات: كنت بترعش في بداية الفيلم

وكشفت إنعام محمد علي عن حالة القلق التي سيطرت عليها خلال تنفيذ الفيلم، قائلة: "أنا كنت في أول الفيلم بترعش، لأن حاسة إنه لو الفيلم ما كانش على مستوى العملية الحقيقية هيقولوا عشان "مدوش العيش لخبازه" عشان المخرجة ست"

وأضافت: "بالتالي كنت قلقانة جدا وخايفة جدا، وأول عرض للفيلم كان في قاعات سينما يعني كبيرة، وكان حاضرها مجموعة كبيرة من الناس العسكريين والسياسيين "

وتابعت: "فالمهم اتصوري إن أنا ما قدرتش أحضر العرض ده، أنا كنت برا واقفة برا قاعة العرض"

وأشارت إنعام محمد علي إلى أن تصوير فيلم "الطريق إلى إيلات" تم في عدد من الأماكن، بينها الإسكندرية وشرم الشيخ