مروة صبري تدافع عن شيرين عبد الوهاب بعد شائعة ارتباطها
دافعت الإعلامية مروة صبري عن الفنانة شيرين عبد الوهاب، بعد تداول شائعة بشأن ارتباطها بنجل مدير أعمالها، مؤكدة أن ما يتم تداوله لا يمت للحقيقة بصلة، مشيدة في الوقت نفسه بعودة شيرين عبد الوهاب إلى طرح أعمال غنائية جديدة خلال الفترة الأخيرة.
وقالت مروة صبري، خلال برنامج "قعدة ستات" المذاع عبر قناة ألفا اليوم: "شيرين عبد الوهاب رجعت تكسر الدنيا مرة تانية وكعادتها شيرين وعدت و وفت، هي تقريبًا من كام شهر قالت: يا جماعة أنا كل أسبوعين هنزل أغنية، أغنيتين، وهفضل طول الوقت معاكوا ومع جمهوري اللي بيحبني".
وأضافت: "وبالفعل نزلت أغنية تباعا تباعا ، وبعدها أغنية بحرية مع محمد حماقي، وبعدين عملت أغنيتين جداد اليومين دول، منهم خاين وكان سنك كام، أغنيتين حلوين أوي، أنا لسه سامعاهم وأنا جاية في الطريق دلوقتي، والحياة لطيفة وجميلة جدًا".
مروة صبري: شيرين عبد الوهاب تتعرض لإشاعات غير حقيقية
وتطرقت مروة صبري إلى الشائعات التي تلاحق شيرين عبد الوهاب، قائلة: "المشكلة الكبيرة إن دايمًا إن أي حد بينجح وخصوصًا الناس اللي اسمها بيتردد كتير، بيطلع عليهم كم إشاعات غير طبيعية، وخلينا نقول إن هي إشاعات مالهاش أي علاقة بالحقيقة".
وتابعت: "شيرين للأسف الناس مش عايزة ترحمها، وليه أنا ما أعرفش، مين اللي ليه مصلحة إن هو يهدم شيرين؟"
وأشارت إلى الشائعة الأخيرة التي طالت الفنانة، قائلة: "طلع عليها إشاعة من أبشع الإشاعات اللي ممكن أي حد يسمعها، طلعت وعملت فيديو مع ابن مدير أعمالها، وشكله سنه صغير جدًا، يطلع إشاعات إيه؟ تتخيلوا، تتخيلوا إيه اللي ممكن الناس تقوله، إن هي على علاقة بابن مدير أعمالها الولد الصغير، عشان كانت بتجامله وبتعمل معاه زي يعني تيك توك أو حاجة على أغنية بحرية".
وأكدت مروة صبري أن ما تم تداوله مجرد شائعة، قائلة: "طبعًا دي ما هي إلا إشاعة ومالهاش أي علاقة بالصحة ".
مروة صبري توجه رسالة إلى شيرين عبد الوهاب
ووجهت مروة صبري رسالة إلى شيرين عبد الوهاب، قائلة: "يعني أنا ما أعرفش الناس بتتفنن وبتتلذذ إن هي تهدم اللي قدامها ليه، و ليةفي التوقيت اللي الست رجعت تنور فيه تاني، ورجعت تعمل أغاني تاني، ورجعت تكسر الدنيا تاني كعادتها، الناس عايزة تهدمها".
وأضافت: "شيرين كملي في طريقك، ما يهمكيش حد طول ما إنتِ صح، ولا تردي حتى على الإشاعة السخيفة دي، ولا تصلحيها، ولا تتكلمي لا كلام سلبي ولا كلام إيجابي، ركزي في طريقك، ركزي في أغانيكي، وأغانيكي حلوة أوي، وألف مبروك، وإن شاء الله تفضلي شيرين عبد الوهاب ملكة الإحساس اللي مكسرة الدنيا".
