عارفة عبدالرسول لـ"وشوشة": اتخضيت من رد فعل الجمهور على ما لم يُحك عن بني مزار
كشفت الفنانة عارفة عبد الرسول عن رد فعلها تجاه التفاعل الكبير الذي حققته الحكاية الثانية ما لم يُحك عن بني مزار من مسلسل القصة الكاملة بعد عرضها، مشيرة إلى أنها كانت تتوقع أن يلقى الدور صدى لدى الجمهور، لكنها لم تتوقع حجم ردود الفعل التي تلقتها.
وتحدثت عارفة عبد الرسول في تصريح خاص لـ"وشوشة" عن ردود الفعل التي تلقتها بعد عرض الحكاية، قائلة:"الحقيقة أنا كنت عارفة إن الدور قوي وممكن يعمل رد فعل كويس عند الجمهور، بس ما كنتش متوقعة رد الفعل القوي أوي ده، وبصراحة أنا اتخضيت، وأنا بحب جمهوري وبثق فيه، والناس كلها عمالة تبعت لي وتقول لي مبروك ويهنوني، وعشان كده أنا دايمًا بحب أنقي أعمالي علشان ما أخذلش جمهوري حبيبي اللي أنا عايشة بيه، لأن أنا عايشة بالجمهور اللي بيشجعني دايمًا، فالحمد لله".
وأضافت عارفة عبد الرسول قائلة:"أنا طبعًا كان عندي فكرة عن الحكاية قبل كده، لأنها حكاية معروفة، بس أول ما قريت السيناريو أنا اتخضيت وقلت: إيه الجمال والحلاوة دي! فرحت جدًا جدًا جدًا، وكمان المخرج أحمد نادر جلال والمنتج مجدي الهواري، ومعايا البطل أحمد عبدالوهاب، وأنا بحب أحمد عبدالوهاب قوي، ففرحت قوي واتحمست جدًا، وكنت مستعدة أعمل أي حاجة علشان الدور ده، يعني لو كانوا علقوني من رجلي كده في السقف كنت هوافق".
وعن كواليس التصوير، قالت عارفة عبد الرسول: "طبعًا إحنا كواليسنا كانت جميلة جدًا بس متعبة للغاية، لأن إحنا بنصور في أماكن صعبة، والمسلسلات الصعيدي والحاجات دي دايمًا بتتصور في شبرامنت ومناطق بدائية، كلها شجر وزرع، فالناموس كان قاتل، الناموسة قد الفيل".
واختتمت عارفة عبد الرسول حديثها قائلة:"مهما تحطي بقى أوف، ومهما تجيبي الأقراص المدورة كده ونحطها، بصراحة كنا بنموت، بس كان بيهون علينا إن إحنا كنا بنقعد نتريق ونضحك، وكل اللي يمسك ناموسة يبقى فرحان إنه مسك ناموسة، لأن الناموس بهدلنا بصراحة، بس الحمد لله إن النتيجة طلعت كده".
أبطال حكاية ما لم يُحك عن بني مزار
يشارك في بطولة حكاية "ما لم يُحك عن بني مزار" كل من أحمد عبد الوهاب، أحمد عبد الحميد، ميشيل ميلاد، مراد مكرم، صفاء الطوخي، وعارفة عبد الرسول، إلى جانب خالد الصاوي كضيف شرف.
والحكاية من تأليف هاني سرحان، وإخراج أحمد نادر جلال، وإنتاج مجدي الهواري.
قصة مسلسل ما لم يُحك عن بني مزار
وتتناول حكاية ما لم يُحك عن بني مزار واقعة بني مزار الشهيرة التي أثارت اهتمامًا واسعًا لسنوات، في ظل ما أحاط بها من غموض وتعدد للروايات والتكهنات بشأن ملابساتها.
ويقدم المسلسل معالجة درامية للقضية من خلال مجموعة من الشخصيات والأحداث، وذلك مع التركيز على الجوانب الغامضة والتساؤلات المرتبطة بها، في محاولة لطرح زوايا مختلفة لما ارتبط بالواقعة من روايات وتفاصيل.
