تامر جلال الشرقاوي لـ"وشوشة": سأتقدم بشكوى للنقابة ضد عمرو عبدالعزيز

رد تامر جلال الشرقاوي نجل المخرج الراحل جلال الشرقاوي على الانتقادات التي وجهها الفنان عمرو عبد العزيز لما يحدث على مسرح الفن، مؤكدًا أنه يتولى إدارة المسرح منذ وفاة والده، وأن المكان ما زال مستمرًا في تقديم عروض مسرحية وإتاحة الفرصة أمام المواهب الجديدة.

وقال تامر جلال الشرقاوي في تصريح خاص لـ"وشوشة": "بعد وفاة والدي الله يرحمه، أنا اللي بقيت بدير المسرح، وحاليًا بنقدم عرضين، هما “الفأر الطباخ” و”الأسد الملك”، وهما عروض عالمية من ديزني وموجهة للأطفال والكبار، وبشهادة الجمهور الناس بتشكر جدًا في العروض دي".

وأضاف: "مسرح الفن بيحاول يقدم عروض هادفة للأطفال والكبار، وأحيانًا الكبار بيكون إعجابهم بالعروض أكبر من الأطفال، وكمان بنحاول ندي فرص لفرق الهواة، وبعد ما بنشوف العرض ونقيم مستواه، لو لقيناه مناسب بنسمح لهم يعرضوا عندنا، لكن لو العرض مش لائق أو مستواه أقل من 70 أو 80%، ما بنوافقش عليه".

وتابع: "دي مساهمة من مسرح الفن في إننا ندي فرصة للشباب والهواة، ويمكن يطلع منهم ناس كويسين وموهوبين، وبالفعل فيه ناس عندها موهبة حقيقية، وأنا عندي فرقتين حاليًا، فرقة “الفأر الطباخ” وفرقة “الأسد الملك”، ومعظم المواهب الموجودة فيها من الهواة، واللي يشوفهم على المسرح هيعرف حجم موهبتهم وقدرتهم على التمثيل".

وعن تصريحات عمرو عبد العزيز، قال تامر:"أنا مستغرب من انتقاده لفرق الهواة، لأن هو نفسه بيشتغل مع فرق هواة، وكل المسرحيات اللي بيعملها تقريبًا بيقدمها مع فرق من الهواة، فإزاي ينتقد الفرق اللي هو نفسه بيمثل معاها".

وأضاف: "أنا هتقدم بشكوى للنقابة عشان يتم التحقيق في الكلام ده، لأنه بصفته إيه يتكلم بالطريقة دي ويتعدى حدوده بالشكل ده هو مين أصلًا عشان يتكلم على مسرح الفن وبصفته إيه يحكم على اللي بيتقدم على المسرح إحنا مش هندي أهمية كبيرة للكلام ده، والنقابة هي اللي تتولى الموضوع وتحقق فيه".

وأكد تامر الشرقاوي أن مسرح الفن مستمر في النهج الذي وضعه والده الراحل، قائلًا: "مسرح الفن ما زال المسرح اللي بيقدم مواهب جديدة، وبيقدم ممثلين ومخرجين جداد، وعلى نفس نهج والدي الله يرحمه، اللي كان دايمًا بيدعم المواهب الجديدة".

وتابع:"أنا قدمت المخرج باسم كرم، وهو من المخرجين الواعدين في السوق ومخرج كويس جدًا، واديته أكتر من فرصة وأثبت إنه فعلًا مخرج شاطر، وده بشهادة الناس والجمهور، وعندنا ممثلين كتير من الهواة على قدر عالٍ جدًا من الموهبة، وده واضح في المسرحيات اللي بنقدمها، وبالتالي الكلام اللي بيتقال عنهم غير صحيح".

ووجه تامر  جلال الشرقاوي رسالة إلى عمرو عبد العزيز، قائلًا: "قبل ما تنتقد الناس وقبل ما تغلط في حد وتنتقده، لازم يكون عندك القدرة إنك تعمل أحسن منه، وساعتها يبقى من حقك تنتقد الآخرين. أنا بصراحة ما شفتلكش حاجة محترمة أو حاجة ذات قيمة فنية تخليني أقول إن من حقك تحكم على الآخرين".

وأضاف: "ما شفتش تمثيل عبقري لحضرتك، ولا شفتك بتبدع في المسرح العالمي أو مسرح القطاع العام، سواء باللغة العربية الفصحى أو العامية، وأنا ما شفتش حاجة من النوع ده".

واختتم تامر جلال الشرقاوي حديثه قائلًا: "مسرح الفن مستمر في تقديم المواهب الجديدة، وهنكمل على نفس النهج اللي بدأه والدي الله يرحمه، ومش هنقف عند كلام من هنا أو هناك، لأن الحكم في النهاية للجمهور وللنقابة والجهات المختصة".

عمرو عبد العزيز ينتقد ما يحدث على مسرح الفن

وكان الفنان عمرو عبد العزيز قد انتقد ما وصفه بما يحدث على مسرح الفن، مؤكدًا أن المسرح يحمل تاريخًا وقيمة فنية كبيرة، باعتباره كان مملوكًا للمخرج الراحل جلال الشرقاوي، وشهد تقديم عدد من المسرحيات البارزة ووقف على خشبته كبار نجوم الفن.

وكتب عمرو عبد العزيز عبر حسابه الرسمي على موقع فيسبوك: مهزلة تحدث على مسرح الفن، مسرح الفن اللي كان مملوك للمخرج الأستاذ جلال الشرقاوي، مسرح له تاريخ وقيمة مسرحية كبيرة، لأنه اتقدم عليه مسرحيات كبيرة زي الجوكر وعطية الإرهابية وعلى الرصيف وانقلاب.

وأضاف: ووقف عليه فنانين كبار زي عبد المنعم مدبولي وسهير البابلي ومحمد صبحي وأحمد بدير ويحيى الفخراني، وفنانين كتير جدًا.

وتابع: لما يوصل بيه الحال إن ناس مالهاش علاقة بالفن تأجره باليوم واليومين عشان يتعمل عليه مسرحيات مالهاش علاقة بالمسرح، ويقف عليه ناس زي شبيه العندليب وشبيه محمود المليجي والأشباه الكتير اللي طالعة اليومين دول، يبقى لازم أتكلم وأقول إن المهزلة دي لازم تتوقف بأي شكل من الأشكال.

واستكمل عمرو عبد العزيز حديثه قائلاً: "ومحدش يقول لي بقى الكلام الأهبل بتاع معلش وسيبهم وحرام، والله العظيم لو موهوبين وبيعرفوا يمثلوا، أقسم بالله كنت روحت اتفرجت وكنت أول واحد يشجعهم ويدعمهم، لحد المسرح.. وستوب".