عبير الشرقاوي لـ"وشوشة": نور الشريف علّمني الالتزام وتحليل الشخصية

تزامنًا مع افتتاح معرض حضرة المحترم نور الشريف، الذي يحتفي بالمسيرة الفنية للفنان الراحل نور الشريف، حرص عدد من الفنانين الذين جمعهم به مشوار فني على استعادة ذكرياتهم معه، والكشف عن أبرز الدروس التي تعلموها منه خلال فترة تعاونهم، سواء على المستوى الفني أو الإنساني.

وقالت عبير الشرقاوي في تصريح خاص لـ"وشوشة":"بصي هو أستاذ نور أول حاجة ملتزم جدا جدا جدا فبيروح بدري قوي يمكن ساعتين ونص قبل ميعاد الكاميرا يقعد في أوضته ويراجع مشاهده ويعمل ميك آب ويظبط لبس فطبعا لما بتلاقي النجم بتاع العمل يعمل كده أنت كمان بتعملي ده علشان ما تبقيش أقل من ده يعني. فهماني؟ ما ينفعش هو يستناك لازم أنت تروحي وتبقي جاهزة قبله كمان دي حاجة".

وأضافت عبير الشرقاوي قائلة:" الحاجة التانية قد إيه هو كان بالذات الشخصيات التاريخية بيقرا عنها بقى مراجع وكتب من وجهات نظر مختلفة علشان يقدر يكون هو وجهة نظر عن الشخصية ويبقى سهل عليه تقمصها وتوصيلها للمتفرج فحتة إنك تقري عن الشخصية بالذات لو تاريخية في حاجة مهمة جدا جدا هو علمها لي".

وتابعت عبير الشرقاوي حديثها قائلة:"طبعا كنا بنشتغل مع بعض لغة عربية فكان صعب علشان التشكيل، والمشاهد كانت بتبقى بالسبعة تمن صفحات وما كانش فيه تقطيع بتاع الكاميرات زي دلوقتي، كانوا بيشتغلوا مشهد على بعض، ما كانوش يعني كانوا بيقطعوا بس يعني إيه بيقطعوا؟ مم الكلام مش بيقطعه الشوت فبالتالي بتعملي المشهد من أوله لآخره مرة واحدة فلو غلطتي في النص بعد أربع صفحات بيضطروا ياخدوا المشهد من أول وجديد تاني".

وأوضحت عبير الشرقاوي قائلة:"فطبعا ده كان لازم يخليكي حافظة صم، تعلمني بقى حاجة قال لي يا عبير سجلي على كاسيت بالأداء وبعد أما تسجلي اسمعي المشهد وانت بتقريه فكده تبقي بتشغلي الحواس كلها تشغلي ودنك وتشغلي عينيكي بتشغلي إحساسك في نفس اللحظة تقومي تحفظي أسرع فالحقيقة دي كانت طبعا حاجة رائعة رائعة رائع كانت بتسهل عليها الحفظ جدا جدا. كنت على طول بقى بعمل كده".

واستكملت عبير الشرقاوي قائلة:"ودايما كنت أقرا عن الشخصية لما بتقري عن الشخصية بتحبيها قوي وتتعلقي بها قوي فيبقى سهل عليك توصيلها للمتفرج بس وهو الله يرحمه كان ملتزم جدا وكان محترم وكان ما بيبخلش علينا كمان بالأداء يعني".

وأضافت عبير الشرقاوي قائلة:"يعني كان يعني قبل ما أنا فاكرة مثلا مشهد من المشاهد  كان الحمل متأخر بتاع زبيدة. فكان فيه مشهد أنا بقى باكلمه فيه وباقول له إن أنا يعني بما معناه إني لسة ما جبتلكش البيبي وإن أنا مش عارفة يعني خايفة تعرف عليا حد".

وأردفت:"فقبل ما نبتدي المشهد راح قايل لي جملة قلبت كياني قال لي إيه؟ أصعب إحساس على الست لما تكون مش بتخلف لأن ده بيبقى الطعن في أنوثتها فاداني مفتاح، عارفة؟ اداني مفتاح. فطبعا عملت المشهد وكان حلو جدا جدا".

واختتمت عبير الشرقاوي حديثها قائلة:"فهو بقى يعني حقيقي كان فنان رائع الله يرحمه الله يرحمه".

عبير الشرقاوي ونور الشريف.. تعاون فني في «عمر بن عبدالعزيز» و«هارون الرشيد»

جمعت الفنانة عبير الشرقاوي بالفنان الراحل نور الشريف أكثر من تجربة فنية، من بينها مسلسل عمر بن عبدالعزيز عام 1994، الذي جسدت خلاله شخصية فاطمة بنت عبد الملك، إلى جانب مسلسل هارون الرشيد عام 1997، وقدمت فيه شخصية زبيدة بنت جعفر. 

كما ضمت مسيرتها عددًا من الأعمال التاريخية، وهو ما يفسر حديثها عن استفادتها من طريقة نور الشريف في قراءة المراجع وتحليل الشخصيات التاريخية قبل تجسيدها.