محمد الشرنوبي عن إطلالته في ألبومه الجديد: "عايز أعمل مزيكا شبهي"
كشف الفنان محمد الشرنوبي عن كواليس التغيير الكبير الذي طرأ على هويته الفنية خلال ألبومه الجديد المقرر طرحه في 2026، موضحا أن ظهوره بالشعر الأشقر وتغيير أسلوب ملابسه واعتماده على الرقص والحركة جاء ضمن رحلة لاكتشاف نفسه وتقديم موسيقى تشبه شخصيته الحقيقية.
محمد الشرنوبي: بطلب من الناس يركزوا في المحتوى
وقال محمد الشرنوبي، من خلال لقاء مع «ET بالعربي»، إنه يتفهم حالة الدهشة التي أصابت الجمهور بعد ظهوره بشكل مختلف، مؤكدًا أن التغيير في الشكل لم يكن الهدف الأساسي من التجربة.
وأوضح: «متفهم جدا الخضة اللي عند الناس، بس يعني بطلب منهم يركزوا في المحتوى ده اللي خد وقت أطول ومجهود أكبر، فده اللي بجد مستاهل إنه يتسمع ويتقيم كويس».
محمد الشرنوبي يكشف خسارة 14 كيلو من وزنه
وأشار محمد الشرنوبي إلى أن اهتمامه بمظهره الخارجي جاء بالتوازي مع العمل على موسيقاه وشخصيته الفنية، موضحا أنه خسر نحو 13 أو 14 كيلو جراما خلال فترة قصيرة.
وتابع: «فكرة إني عملت شعري أصفر وغيرت طريقة لبسي واجتهدت على إن أنا أعمل شكل جسمي كويس وكل الحاجات دي كانت جزء من الشغل اللي بشتغله على نفسي وجزء من الاكتشاف اللي بكتشفه لنفسي».
وأضاف: «وخسيت تقريبًا من أول رمضان لحد شهر 6 أو 7، خسيت مثلاً 13 - 14 كيلو، إزاي بقى أكل بقى وتمرين ونوم».
وتحدث محمد الشرنوبي عن الصورة التي ارتبط بها في بدايات مشواره الغنائي، مشيرًا إلى أنه شعر بأنه أصبح محاصرًا في قالب محدد لا يعبر عن شخصيته الحقيقية.
وقال: «أنا في الأول اتزنقت في الحتة بتاعة المطرب الحبوب الخلوق المؤدب اللي بيلبس بدلة جميلة».
محمد الشرنوبي: كنت عايز أعمل حاجات شبه سني
وأكد محمد الشرنوبي أن الصورة الهادئة والكلاسيكية التي ظهر بها سابقا لم تكن تعكس طبيعته، موضحا أنه يرغب في تقديم نفسه للجمهور بصورة أقرب إلى شخصيته وعمره الحقيقي.
واستكمل: «والحقيقة إن ده مش أنا، يعني أنا في الآخر عايز أهزر وعايز ألعب وعايز أجرب حاجات جديدة وعايز أكتشف حاجات جديدة».
وأوضح أن أعماله السابقة في التمثيل والغناء جعلت الجمهور يتخيل أنه أكبر سنا، قائلًا: «فجأة بسبب الطريقة اللي كنت بغني بيها قبل كده الناس كانت فاكرة إن أنا عندي مثلاً 40، 45 سنة، وبسبب التمثيل لأني عملت أدوار شوية كبيرة فكنت عايز بس أعمل حاجات شبه سني دلوقتي اللي هو 30 سنة، شاب في مقتبل عمره».
واختتم الشرنوبي حديثه بالتأكيد على رغبته في التحرر من الصورة التقليدية للمطرب، وتقديم موسيقى تعبر عن طاقته وشخصيته بعيدًا عن القوالب الكلاسيكية.
وقال: «هبتدي أكون شاب عادي، مش عايز أكون بغني في الأوبرا ومش عايز أكون لابس بدلة وواقف قدام مايك ومش عارف أتحرك، مش عارف أخد راحتي ومش عارف أخد مساحتي».
وأضاف: «وأنا مش بني آدم هادي يعني، أنا بني آدم بحب ألعب وبحب أهزر وبحب أنطلق، فكنت عايز أعمل مزيكا شبهي، مزيكا شبه شوية طاقتي وشبه شخصيتي».
