أحمد كمال يشيد بـ"منة شلبي": ممثلة كبيرة وعندها أداء تمثيلي فطري
كشف الفنان أحمد كمال، عن كواليس تجربته في تدريب عدد من الفنانين، مشيرًا إلى أنه يفضل العمل مع الممثل الذي يمتلك رغبة حقيقية في التطور وشغف بالتعلم.
أحمد كمال: الاهتمام بيبان في الورش
وقال أحمد كمال، من خلال لقاء في برنامج “معكم” مع الإعلامية منى الشاذلي، إن أكثر ما يلفت انتباهه في المتدربين هو مدى اهتمامهم ورغبتهم في تطوير أنفسهم، موضحًا: «أنا بحب الممثلين اللي عايزين يتطوروا، اللي عايزين يطوروا من نفسهم وعايزين يبقوا أحسن ومجتهدين وشاطرين».
وأضاف أن سلوك الممثل داخل ورش التدريب يكشف مدى جديته، قائلا: «ما هو كلهم بيقولوا كده، لكن في السلوك بيبان، في الورش بيبان مين اللي جد وبجد عايز يتعلم، وفي اللي جاي نص ونص، وفي اللي جاي بينام، يعني روحه مش مهتم».
وأشار إلى أن بعض المتدربين قد يبدأون التجربة بحالة من عدم التركيز، لكن مع الوقت يتغير الأمر، موضحا: «في الأول كده، بس بعد كده ما بيصحوا، لازم طبعًا يصحوا، فبيبان مدى اهتمام الناس».
أحمد كمال عن أحلام المتدربين في ورش التمثيل
وتحدث أحمد كمال عن بعض المواقف التي جمعته بمتدربين لديهم طموحات كبيرة في مجال التمثيل، موضحًا أن بعضهم كان يطلب منه الوصول إلى مستوى نجوم كبار.
وقال: «بحب الناس المهتمة والمتحمسة اللي عندها شغف، اللي مش مستنية مقابل. لما يجي لي حد يقول لي: أنا ممكن تخليني زي هند صبري؟ حصل لي كتير، واللي تقول لي أنا عايزة أبقى منة شلبي، بتبقى أحلام».
أحمد كمال يكشف تفاصيل تعاونه مع منة شلبي
وعن تجربته مع الفنانة منة شلبي، أوضح أحمد كمال أنها تدربت معه لفترة داخل الاستوديو، إلى جانب عدد من الفنانين، بينهم منة وهاني مطاوع وبسمة ونيلي كريم.
وأكد أحمد كمال أنه أحب العمل مع منة شلبي بشكل خاص، مستشهدا بأحد المواقف التي جمعتهما خلال تصوير مسلسل «حارة اليهود»، قائلا: «هي نفس الحكاية، افتكر مثلا في حارة اليهود كانت مشاهدي أنا مش فيها، بس هي فيها لوحدها يعني مع إياد».
وتابع: «كانت تقول لي: ممكن تيجي تقف بس جنب الكاميرا؟ فكنت أقف لها كأن أبوها واقف لها كده، فمن الآخر تبص لي كده وترجع تكمل تمثيل».
وأضاف أن العلاقة بينهما لم تقتصر على الجانب المهني فقط، قائلا: «بقى في علاقة إنسانية كمان بيني وبينها جدًا، حصل كده بينا وبين بعض».
أحمد كمال: منة شلبي ممثلة كبيرة جدًا
وأشاد أحمد كمال بالتطور الذي شهدته منة شلبي منذ بداياتها الفنية، مؤكدًا أنها أصبحت من أبرز الممثلات، وقال: «منة شلبي أولًا أخذت جائزة أحسن ممثلة في مهرجان الجونة، وقبلها مهرجان القاهرة السينمائي، يعني حصل تطور رهيب من بدايتها لحد ما بقت ممثلة كبيرة».
وأضاف: "بقت عندها أداء تمثيلي فطري، وبتختار كتير، ما بتختارش أي حاجة، ما بتمثلش في أي حاجة".
