كزبرة لـ"وشوشة": تعمدنا تقديم عمل مختلف عن الحريفة.. ومحمود التاني تجربة جديدة

تحدث الفنان أحمد بحر الشهير بـ كزبرة في تصريح خاص لـ"وشوشة" على هامش العرض الخاص لفيلمه الجديد محمود التاني، الذي يجمعه بالفنان أحمد غزي، عن كواليس اختيار العمل والتحديات التي واجهتهما بعد النجاح الذي حققه الثنائي في سلسلة أفلام الحريفة.

كزبرة: التحدي كان تقديم عمل مختلف عن الحريفة

وقال كزبرة: "التحدي إن بعد الحريفة 2 كان في توقعات كتير، الناس كانت بتسأل إحنا هنرجع بحاجة شبه الحريفة ولا هتبقى حاجة مختلفة، فإحنا قعدنا الفترة دي كلها عشان نبدأ نشتغل على حاجة مختلفة، تبقى جديدة وتبقى مختلفة عن الحريفة".

وأضاف كزبرة قائلاً:"إحنا بنستنى العمل اللي يليق علينا إحنا الاتنين، ويبقى مناسب لينا إحنا الاتنين، فالحمد لله ده حصل في محمود التاني".

كزبرة: هدفنا الأساسي كان خدمة الفيلم

وعن التعاون مع فريق عمل محمود التاني أوضح كزبرة:"التعاون مع الأستاذ تامر هجرس وكارولين وجنا، إحنا كلنا كان هدفنا الفيلم، كلنا هدفنا نخدم العمل، والحمد لله ده حصل".

وتابع كزبرة حديثه قائلاً:"وأستاذ إياد صالح كاتب ورق حلو أوي وأستاذ عبد العزيز فالحمد لله كل العناصر اجتمعت عشان نقدم حاجة مختلفة وإن شاء الله الفيلم يعجب الجمهور".

كزبرة يتحدث عن محمود الليثي

وتطرق كزبرة خلال حديثه إلى الفنان محمود الليثي، قائلًا:"هو محمود الليثي نجم كبير، وحابب إن اسم الفيلم على اسمه محمود، فمحمود الليثي نجم كبير وأنا بحبه وبحب عم المجال كله".

كزبرة عن محمد إمام: أخويا الكبير

كما تحدث كزبرة عن الفنان محمد إمام وفيلمه الجديد شمس الزناتي، قائلًا:"محمد إمام ده أخويا الكبير نجم كبير وأكيد هو لما بيدخل عمل بيبقى دارسه كويس أوي، من معرفتي بيه الشخصية".

وأضاف:"أكيد عارف إن العمل ده بيبقى مختلف عن شمس الزناتي الأول، وإن شاء الله يكسر الدنيا، لأنه يستاهل كل خير".

كزبرة: أنا راضي عن حياتي ومش بحب أهزر في الشغل

وعن النجوم الذين يتمنى أن يعيش حياتهم، قال كزبرة:"والله كل النجوم أحب أعيش حياتهم، بس أنا راضي بحياتي جدًا وحاببها، والحمد لله وحاببها".

وتحدث عن صورته المعروفة عنه باعتباره شخصًا كثير الضحك، موضحًا:"بصي إحنا بقالنا أربع سنين في الشغلانة صح؟ أول ما تسألي عليا بيقولوا الكلمة دي، لكن أنا مش عارف اللي هو أكتر حد بيضحكوا مين".

واختتم كزبرة حديثه قائلًا:"إحنا في الشغل مينفعش نضحك، لأن بيبقى في ناس شغالة كتير، وفي كرو، وفي مخرج، وفي العمل ليه احترامه، مينفعش نقعد نهزر وهو موجود. يارب محمود التاني يعجبكوا".