عمرو الشاذلي لـ”وشوشة”: شغلي مع تامر عاشور له طعم خاص
تحدث الملحن عمرو الشاذلي عن كواليس تعاونه مع الفنان تامر عاشور في أغنية “شوفتني”، إحدى أغنيات ألبوم “مراية الحب”، مؤكدًا أن علاقة الصداقة والثقة بينهما تنعكس دائمًا على جودة الأعمال التي يقدمانها معًا.
وقال الشاذلي في تصريح خاص لـ“وشوشة”: “أنا دايمًا ببقى مركز إني أعمل حاجة حلوة، وشغلي مع تامر عاشور بحبه جدًا وبستناه، لأننا أصحاب على المستوى الشخصي، فببقى حابب أقدمله أفضل حاجة. الحمد لله عملنا مع بعض أغاني مهمة جدًا الفترة اللي فاتت زي (هيجيلي موجوع)، و(تيجي نتراهن)، و(خليني في حضنك)، وربنا دايمًا بيكرمنا".
وأضاف: “إحنا بنشتغل مع بعض بقالنا فترة كبيرة، وعشان كده بقى فيه ثقة كبيرة بينا، تامر بيثق في ذوقي وأنا كمان ببقى حريص أقدمله أحسن لحن، والحمد لله النتيجة دايمًا بتكون مرضية لينا وللجمهور".
وعن كواليس العمل مع تامر عاشور، قال: “هو شخص محترم جدًا وفنان حقيقي، وذوقه الموسيقي مميز، وصوته تحفة، وعنده جمهور كبير بيستنى كل جديد ليه، وده بيخلي الشغل معاه ممتع جدًا، ومفيش لحظة ملل وإحنا بنشتغل".
وتطرق إلى ردود الأفعال على الأغنية، قائلًا: “أي فنان بيتعب ويجتهد علشان يشوف شغله عاجب الناس، والحمد لله لما بلاقي ردود الأفعال الحلوة بحس إن التعب راح، وإحنا في الآخر بنعمل اللي علينا، والتوفيق من عند ربنا".
واختتم عمرو الشاذلي حديثه بالكشف عن أعماله المقبلة، قائلًا: “في الفترة الجاية عندي أكتر من مشروع جديد، شغال على أغنيات مع تامر عاشور، وكمان في تعاونات مع الفنانة أصالة، ورحمة رياض، وعدد من النجوم، وإن شاء الله الجمهور هيشوف حاجات تعجبه جدًا".
ويواصل الملحن عمرو الشاذلي ترسيخ مكانته كواحد من أبرز ملحني جيله، بعدما نجح في تقديم عدد كبير من الأغنيات التي حققت نجاحًا جماهيريًا واسعًا مع كبار نجوم الغناء، بفضل أسلوبه الموسيقي المتجدد وقدرته على صناعة ألحان تجمع بين البساطة والتميز، وهو ما جعله واحدًا من الأسماء التي تحظى بثقة المطربين والجمهور على حد سواء.
