أحمد السماحي لـ"وشوشة": لست ضد الذكاء الاصطناعي..ولكن مع تقنينه حتى لا نفقد الإبداع
يرى الناقد الموسيقي أحمد السماحي أن الذكاء الاصطناعي أصبح جزءًا لا يتجزأ من المشهد الفني الحالي، خاصة مع انتشاره الواسع في صناعة الأغاني والكليبات، وهو ما خلق حالة من الجدل حول تأثيره على الإبداع الفني ومستقبل الموسيقى.
وفي هذا السياق تحدث أحمد السماحي في تصريح خاص لـ"وشوشة"، قائلًا: "إحنا دلوقتي بنعيش ظاهرة الذكاء الاصطناعي، والذكاء الاصطناعي دخل حياتنا الفنية بقوة، بقى موجود في معظم كليبات المطربين، وكمان دخل في تأليف الكلمات والتلحين والتوزيع، وبقى في ملحنين وموزعين وشعراء بيستخدموه، وأنا مش ضد ده خالص، لأنه وسيلة من وسائل التكنولوجيا الحديثة اللي لازم نستفيد منها ونستثمرها بشكل كويس، لأنه حاجة عظيمة جدًا”.
وأضاف أحمد السماحي قائلاً: "لكن لازم نقنن استخدامه، لأن مع الوقت ممكن كل الأعمال تبقى شبه بعض، سواء في التلحين أو التوزيع أو الكلمات، لأن الذكاء الاصطناعي مش مبدع زي الإنسان، هو بيعتمد على تجميع الموجود بالفعل، مش بيخلق حاجة جديدة، وده الفرق بينه وبين الإنسان اللي ربنا خلقه عنده ملكة الإبداع".
وتابع أحمد السماحي حديثه قائلاً:"الذكاء الاصطناعي ممكن يكتب موضوع أو يعمل لحن، لكنه في الأساس بيعتمد على حاجات موجودة قبل كده، وبالتالي مش بيقدم جديد حقيقي، وده نفس اللي بيحصل دلوقتي في بعض الأغاني، حتى بعض المطربين بقوا يستخدموه عشان يساعدهم يوصلوا لمقامات معينة".
أحمد السماحي يشير الى تأثيره على التراث البصري
وأشار أحمد السماحي إلى تأثيره على التراث البصري أيضًا، قائلًا:"شفنا دلوقتي تلوين صور النجوم القدامى بالأبيض والأسود، وده أفقدنا جمال الأبيض والأسود، وبقى في لخبطة، وممكن الأجيال الجديدة تفتكر إن الصور الأصلية كانت كده".
واختتم أحمد السماحي حديثه قائلًا:"أنا مش ضد الذكاء الاصطناعي، لكن مع تقنينه، لأن استخدامه بشكل مفرط هيخلي الساحة الفنية كلها شبه بعض، وهيفقدنا الإبداع وهويتنا الشرقية، وهيبقى زي الورد الصناعي، شكله حلو لكن من غير روح ولا رائحة زي الورد الطبيعي".
