إبراهيم عيسى يكشف هدفه من فيلم "الملحد": سهولة التعايش مع الملحدين

كشف الإعلامي والكاتب إبراهيم عيسى عن هدفه من كتابه فيلم "الملحد"، الذي انطلق عرضه الأول منذ أيام، عقب 16 شهرًا من المنع والمفاوضات.

هدف الفيلم: التعايش مع الملحدين

وأوضح إبراهيم عيسى، خلال استضافته في حلقة اليوم من برنامج “الصورة” مع الإعلامية الكبيرة لميس الحديدي، المذاع عبر شاشة النهار، أن الهدف الرئيسي من كتابة هذا الفيلم هو أن يتعايش المشاهد مع الملحدين، قائلاً:"لان دي التهمة اللي توجهت للفيلم، لكن هو ده كان هدفي… يعني أنا بشوف إن الملحد إحنا ممكن نناقشه، نسمعه ونتفهمه، لكن في الآخر نسيبه، وهو حر.
ليه القهر وللكبار؟ أنا رسالتي اللي كنت عايز أقدمها في الفيلم إن الإيمان إيمان قلب مش عقل، وسيبوا الناس تؤمن أو تكفر، دي علاقتها مع ربنا، وهيحاسبها ربنا، وإحنا مش حكام، ولا على القلوب ولا على الضمائر."

الرسالة الدرامية للفيلم

وتابع:"هو ده كان المعنى اللي اتعمل عليه الدراما كلها.
والفيلم لو اتجرد من الرسالة اللي أنا عايز أوصلها دي، ممكن الفيلم يكون باسم 'هل أقتل ابني'.
يعني دلوقتي لو حد قدامه ابنه ملحد، هو هيعمل إيه؟ هل هيقتله؟"

الضغط قد يولد الكفر

واختتم الكاتب والإعلامي إبراهيم عيسى حديثه قائلاً:"في الفيلم، لما اتشال من عليه كل الضغط ده، وصل للإيمان عادي. لأن فعلاً، أنت دايمًا بنسمع كده طول اليوم، لما حد بيبقى مضغوط جدًا تقول له: هو أنتم هتكفرونا؟
فعلاً ممكن الضغط يعمل كده.. ومهما كان التعبير ده يستخدمه المواطن المصري بشكل عام، بس فعلاً الضغط ممكن يوصل لكده."