تامر أمين يفتح النار بعد الخروج من كأس العرب: فضيحة تستوجب المحاسبة
تحدث الإعلامي تامر أمين عن خروج منتخب مصر من بطولة كأس العرب المقامة في دولة قطر، معبرًا عن حالة الغضب والإحباط التي تسيطر على الشارع الرياضي المصري.
وخلال السطور التالية، يرصد لكم موقع “وشوشة” أبرز تصريحات تامر أمين خلال حلقة اليوم من برنامج "آخر النهار"، المذاع عبر شاشة “النهار”.
"خرجنا بنجر أذيال الخيبة"
قال الإعلامي تامر أمين: "فكرة إن كأس العرب شغال وإحنا خرجنا منه، وإحنا بنجر أذيال الخيبة وده أقدم مصطلح ممكن أوصف بيه اللي حصل ده، وأنا حاسس بكم الإحباط والحزن والغضب اللي موجود عندنا كلنا كمصريين".
وأضاف: "وعلى فكرة، ده مش عشان الخسارة، هو إحنا يعني كنا بنكسب كل البطولات؟! لا طبعًا، الخسارة واردة في الكورة، لكن الخسارة تبقى بشرف، وتكون عملت اللي عليك وبدلت مجهود، لكن توفيق ربنا ما كانش معاك".
"الهزيمة مش خسارة.. دي فضيحة"
وتابع أمين حديثه قائلا: "معروف إن الكورة هزيمة ومكسب، لكن إنك تعمل كل حاجة غلط، وتسيء لسمعة بلدك، وما تخططش، وما تذاكرش، وتاخد كل القرارات الغلط، هنا ما تبقاش خسارة ومكسب، هنا تبقى فضيحة، وفشل، وعقاب، ولازم له محاسبة".
"فين المسؤول؟ محدش بيطلع يتحاسب"
واستكمل الإعلامي تامر أمين تصريحاته قائلًا: "في ألف واحد لما بيكون في مكسب بيطلع يقول أنا ساهمت، وأنا قدمت، وأنا السبب في النجاح، لكن إحنا النهارده اتهزمنا هزيمة يتيمة، وأنا بقى عايز واحد يطلع يقول أنا المسؤول عن اللي حصل ده".
وأضاف: "طبعًا محدش هيتكلم، وكله هيسكت، لأن ما فيش حد هيطلع يقول: أنا غلطت ولازم أتحاسب، ومش هكرر الغلطة دي تاني، علشان كده الهزيمة هتيجي تاني، والفضيحة هتيجي تاني، لأن إحنا مش بنتعلم من أخطائنا".
"السبب في الفضيحة مش حلمي طولان ولا اللعيبة"
وأوضح أمين موقفه من توجيه اللوم للجهاز الفني واللاعبين، قائلًا: "كل الناس بتلوم حلمي طولان، وأنا بقول لكم مش هو السبب. وبرده ناس كتير بتلوم اللعيبة، وأنا بقول لكم مش هم السبب".
وأضاف مؤكدًا: "دايمًا بص على السبب مش النتيجة".
"المسؤول الحقيقي هو رئيس اتحاد الكرة"
واختتم تامر أمين تصريحاته قائلًا: "من وجهة نظري، أنا شايف إن السبب والمسؤول الحقيقي هو رئيس الاتحاد المصري لكرة القدم، هاني أبو ريدة، لأنه ما فيش حد تاني بيدير منظومة كرة القدم في مصر غيره".