يوسف حشيش وآية سليم يكشفان كواليس “ورد وشوكولاتة”
كشف الفنان يوسف حشيش والفنانة آية سليم عن كواليس تجسيدهما لشخصياتهما في مسلسل ورد وشوكولاتة.
وخلال السطور التالية ينقل لكم موقع وشوشة أبرز تصريحاتهما لبرنامج "ET بالعربي".
يوسف حشيش: تجربة جميلة وكواليس مليئة بالطاقة
أعرب الفنان الشاب يوسف حشيش عن سعادته بالمشاركة في مسلسل ورد وشوكولاتة، قائلاً:"المسلسل كله بالنسبة لي حلو قوي وتجربة لذيذة جدًا، وسعيد جدًا بالشغل مع المخرج ماندو العدل، ومحمد فراج طبعًا، لأن أنا أصلًا من معجبينه... ففكرة إني أكون معاه في نفس المسلسل دي حاجة جميلة.
والنجمة زينة ومريم الخشت وآية سليم... والدور كان حلو جدًا ، وحسيت إنه كده في شكل مختلف ولذيذ."
وتابع قائلًا:" آية سليم أصلًا شخصية لذيذة جدًا، وشاطرة جدًا، وأنا مبسوط جدًا إننا اشتغلنا مع بعض."
آية سليم: شخصية مختلفة… وفيها جانب شرير لأول مرة
ومن جانبها، أضافت الفنانة آية سليم قائلة:"الدور بالنسبة لي كان عاجبني جدًا، وكنت حاسة إن فيه حاجة كده مختلفة أنا ما قدمتهاش قبل كده. والكيمياء الموجودة بيني وبين يوسف حشيش عكس تمامًا اللي ظاهر على الشاشة؛ لأن المسلسل دراما.
ولأني كمان أغلب الأدوار اللي عملتها كنت فيها طيبة وغلبانة، لكن الدور ده فيه سنة شريرة، فعجبني قوي."
عن آخر أعمالها قبل "ورد وشوكولاتة"
وفي إطار حديثها عن آخر عمل قدمته قبل مسلسل ورد وشوكولاتة، قالت آية سليم إن آخر ظهور لها كان في مسلسل وبينا ميعاد مع الفنان صبري فواز والنجمة شيرين رضا، مضيفة:"الدور كان حلو قوي، وشخصية أروى كانت جميلة، بس هي كانت ساذجة… مش طيبة، بس كانت عبيطة."
آية سليم: هادئة بطبعي… وهذا يثير استفزاز من حولي
واختتمت الفنانة القديرة آية سليم حديثها قائلة:"أنا مش بتعامل مع المشاكل زي شخصية أروى، لا… أنا بتعامل بهدوء، من غير أي عصبية، لدرجة إن اللي قدامي بجد بيستفز من هدوئي، وإني مش بدي أي رد فعل، علشان كدا اللي قدامي بيتعصب من رخامتي، بس هي دي الطريقة اللي بجيب حقي بيها."