أحمد فهمي: عمري ماقدرت أمثل.. أنا واضح حتى لو ده بيجيب مشاكل

علق الفنان أحمد فهمي على الإنتقادات التي تتوجه له بسبب تعامله بطبيعته في البرامج.
 

وخلال السطور التالية ينقل لكم موقع وشوشة أبرز تصريحاته خلال استضافته في برنامج "mirror" المذاع عبر موقع التواصل الاجتماعي يوتيوب، ويقدمه الإعلامي خالد فرج.

"في برامج بتطلب إنك ما تكونش صريح… وأنا بكره ده"

قال الفنان أحمد فهمي إن هناك عددًا من البرامج تتطلب منه أن يكون غير واضح أو لا يرد بصدق على بعض الأسئلة، في حين أنه يكره هذه الصفة ولا يحب التعامل بها.
وأكد:"أنا بفضل إني أجاوب على الأسئلة بمنتهى الصراحة."

"هفضل واضح رغم الانتقادات والتريقة"

وتابع:"أنا هافضل أجاوب على الأسئلة بمنتهى الصراحة… بالرغم من انتقادات الجمهور أو التعليقات السخيفة اللي بواجهها بسبب الوضوح."

"الآية اتعكست… بقوا يتريقوا علشان بنجاوب بصراحة"

وأوضح قائلًا:"أنا بتضايق من الانتقادات دي لسبب… إن الآية بقت معكوسة. بدل ما الناس كانت بتفرح إن إحنا بنجاوب بصراحة… بقوا يتريقوا علينا علشان بنجاوب بصراحة."

"عمري ما قدرت أكون شخص غيري… وبدفع فاتورة الوضوح"

واختتم الفنان أحمد فهمي حديثه قائلًا:"على مدار سنين… أنا عمري ما قدرت أكون شخص غيري. بالرغم من كل الحاجات اللي بواجهها، تعليقات سخيفة أو انتقادات أو ناس بتتريق… أو أي حاجة. أنا عمري ما قدرت أمثل بره التمثيل قدام كاميرا البرنامج. أنا أحمد فهمي بردودي… حتى لو هتجيب لي مشاكل. الإنسان بيدفع فاتورة كبيرة جدًا على إنه يبقى واضح… في مجال كله شو علشان البيزنس."

مش بحضر كل التكريمات

وأضاف فهمي:"وعلى فكرة… فكرة إن المجال بتاعنا بقى أغلبه بيزنس دي أكتر الحاجات اللي بتخليني مش بحضر كل التكريمات اللي بتجيلي.
وده مش علشان بقلل… لا طبعًا.أنا مبسوط جدًا إني بتكرم… وبحب وبشكر الناس.
 

وأردف: "لكن أنا مبقتش أحضر… لأني بقيت أحس إن في مهرجانات كتير بتتعمل مش فارق لها اللي موجود أحمد فهمي، ولا شيكو، ولا هشام، ولا أحمد مكي. فارق لها إن يكون في نجوم موجودة علشان يعملوا شو… علشان يبقى اسمه مهرجان. أنا مش بقول إن ده وحش… ده كويس، ولكن مهم إن الفنان يحس إن وجوده مهم… مش وجود فنانين عمومًا هو اللي مهم."

واختتم: "يعني مثلًا… لما يجي لي تكريم من مهرجان القاهرة… أكيد طبعًا هفرح وهروح، لأن ده مهرجان القاهرة… قيمة فنية كبيرة جدًا."