"بنات الباشا" يتألق في مهرجان القاهرة السينمائي.. كواليس يكشفها النجوم لأول مرة

شهد مهرجان القاهرة السينمائي عرض الفيلم المصري الجديد بنات الباشا جلال ضمن فعاليات دورته الـ46.
وخلال السطور التالية ينقل لكم موقع وشوشة أبرز تصريحات فريق عمل فيلم بنات الباشا لشاشة “القناة الأولى للتلفزيون المصري”، على هامش حضورهم فعاليات الدورة الـ46 من مهرجان القاهرة السينمائي الدولي.

مريم الخشت تكشف كواليس انضمامها للفيلم

كشفت الفنانة مريم الخشت عن كواليس انضمامها لفيلم بنات الباشا، وقالت:"أستاذ محمد العدل المخرج أول ما كلمني قالي إن الفيلم ده مأخوذ عن رواية، فأنا نزلت اشتريت الرواية علشان أقراها، ولما قريتها عجبتني جدًا وحبيتها، وما كنتش عايزة أسيبها إلا لما أخلصها، والحمد لله كان حظي حلو إن أكتر شخصية اتعلقت بيها في الرواية كانت هي الشخصية اللي هو عايزني أعملها".

أحمد مجدي: تحمست للعمل بسبب كل عناصره

وقال الفنان الشاب أحمد مجدي إن كل العناصر المنضمة لهذا العمل كانت محمسة وجعلته يتشجع للانضمام للفيلم.
وأضاف:"أنا بحب أشتغل مع محمد العدل لأنه مخرج شاطر، وببقى في أحسن حالاتي وبظهر بشكل كويس جدًا معاه، كمان فيه مجموعة كويسة قوي قوي من النجمات أنا أحب إن أنا أشاركهم في فيلم، وكمان شركة الإنتاج إحنا أصدقاء، فكل دي حاجات شجعتني إن أنا أعمل الفيلم ده.
وطبعًا الدور دور جميل جدًا ومركزي ومهم، وكل القصص اللي في الفيلم أساسًا جميلة وبتعكس جوانب كتير من الشخصية المصرية أو العربية، وأنا بحب إن أنا أقدم أفلام يكون فيها قيمة فنية وإنسانية وأدبية، وبتناقش قضايا مهمة، أنا شايف إن الفيلم هيبقى مميز جدًا جدًا في الحاجات دي".

ناهد السباعي: تقديم دور بنت تغني كان تحديًا كبيرًا

ومن جانبها أضافت الفنانة ناهد السباعي قائلة:"إني أقدم دور بنت بتغني… ده كان حاجة صعبة جدًا بالنسبة لي، بس طبعًا بما إنه تأليف أستاذ عبية، فكان لازم أوافق، والفنان لما بيلاقي كل العناصر اللي موجودة كبيرة وتشجعه إنه يدخل فيلم… هيغامر".

محمد هشام عبية: تحويل الرواية لفيلم فرصة للإبداع

أما مؤلف الفيلم محمد هشام عبية فأكد أن تحويل أي رواية إلى فيلم هو شيء جميل، وأنه أخذ من الرواية شخصيات وأضاف عليها إلى جانب السيناريو الذي كتبه.
 

وقال:"طول ما إحنا عندنا شخصيات جميلة زي الشخصيات اللي موجودة في الرواية، لازم السيناريو يطلع جميل، وده بيديني فرصة إن أنا أزود إبداع على إبداع الرواية نفسها، وأتمنى إنه يعجب الناس، لكن ما تقارنوش بالرواية… لأن في الأول والآخر الرواية وتحويلها لفيلم زي ما تكون حولت تفاحة لبرتقالة؛ الاتنين فاكهة والاتنين فن، لكن تشريحهم وطريقة عرضهم مختلف".

زينة: مشاركة الفيلم في المهرجان تكريم كبير

وفي الختام أكدت الفنانة زينة: "مشاركتي بفيلم بنات الباشا في الدورة الـ46 من مهرجان القاهرة السينمائي الدولي ده في حد ذاته تكريم للفيلم".
وأوضحت أن صناع الفيلم لم يكونوا على دراية بمشاركته أثناء التصوير، وقالت: "دي فرحة تانية خالص… علشان هو يشارك في مهرجان بلدنا، وده تكريم كبير للفيلم".