"لازم أعلم بنتي".. الإعلامية أسما إبراهيم تكشف عن أهم دروس حياتها لأول مرة

في حوار خاص مع الإعلامي حسام المراغي، كشفت الإعلامية أسما إبراهيم عن أهم درس تعلمته في حياتها، وتحدثت عن تفاصيل شخصية لأول مرة، وخلال السطور التالية ينقل لكم موقع "وشوشة" تصريحاتها خلال استضافتها في بودكاست "دوبامين" المذاع عبر شاشة قناة الحياة ويقدمه الإعلامي حسام المراغي.

عنوان قصة حياتها: اليقين بالله

تحدثت الإعلامية أسما إبراهيم عن الاسم الذي تود أن تضعه عنوانًا لقصة حياتها وازدهارها، وقالت: "أحب أسمّيها اليقين بالله سبحانه وتعالى... مش هقول إني نحتُّ في الصخر، أنا بقول الواقع... اليقين بالله إني هعمل حاجة كويسة وهقدّم للجمهور حاجة كويسة، ولما أشتغل هنجح... فعلاً، اليقين بالله، أنا طول الوقت بصدق حلمي أوي وبصدق نفسي جدًا."

وأضافت أسما إبراهيم قائله:"لازم يبقى عندك يقين إن حلمك هيتحقق، وصدق نفسك أوي... ربنا بيحبّبني في الشيء ده، يبقى أكيد ربنا هيعملهولي... انت لما بتطلب من حد حاجة وتقول أنا واثق فيه، بتكون مطمئن... تخيّل ده ربنا بقى".

الدرس الأهم الذي تعلمته في حياتها

وفي سياق متصل، كشفت الإعلامية أسما إبراهيم عن أهم درس تعلمته في حياتها وتتمنى أن تُعلّمه لأولادها، حيث قالت:"أنا نفسي أعلّم بنتي مليكة بالتحديد إنها متديش ثقتها لكل البني آدمين، ولا تصدّق كل الناس... ولازم تكون واثقة في نفسها، وعندها القوة إنها تكمّل، مش تتخرّج وتتجوّز وبس... لأ، لازم يكون عندها حلم وتبني حاجة في دماغها وتوصّل ليها، وتمشي ورا حلمها وتصدّقه... مينفعش خالص نقعد نعلّم بناتنا طول الوقت إن اتعلمي وبعدين اتجوزي... آه دي سُنّة الحياة، لكن لازم يكون عندها حلم وطموح وتكون حاجة وحلم."

وأضافت:"أنا كمان طول الوقت بحاول أعلّم البنت بالتحديد، لأن أخوها ولد... وأنا بقول إنه في الأول والآخر راجل، لو متعلّمش في البيت الدنيا هتعلّمه، هو راجل وأنا شرقية جدًا في الحِتّة دي، بس البنت مهم نعلّمها كل حاجة."

نصيحتها لنفسها إذا عاد بها الزمن

واختتمت الإعلامية أسما إبراهيم حديثها بالتصريح عن النصيحة التي كانت ستوجّهها لنفسها لو عاد بها الزمن حتى لا تقع في خطأ معين، وقالت:"إني أصدّق الناس بسهولة... دي لأ، بلاش بجد".