مدحت العدل عن مسرحية "أم كلثوم": لازم مصر كلها تشوفها
تحدث المنتج والمؤلف الكبير الدكتور مدحت العدل عن كواليس اختياره لإنتاج مسرحية “أم كلثوم”، وخلال السطور التالية ينقل لكم وشوشة تصريحاته خلال لقائه في برنامج "معكم" مع الإعلامية منى الشاذلي ،المذاع عبر شاشة "ON".
وأكد العدل أن قراره جاء بعد كتابته لقصيدة "صوت الست"، مشيراً إلى أن هذه اللحظة كانت الشرارة الأولى للمشروع، قائلاً: "أنا كتبت قصيدة صوت الست وحسيت إني مش هعمل غير ده.. مش هعمل غير أم كلثوم. وكان لازم تتعمل السنة دي علشان مرور خمسين سنة، فابتديت أفكر مين اللي هيخرج؟ وأنا كنت كاتب المسرحية في دماغي."
تجربة تعيد الجمهور إلى زمن الطرب
وأضاف العدل موضحًا حجم العمل وهدفه الرئيسي في الوصول للأجيال الشابة:"احنا عاملين تجربة ضخمة ومهمة ويعنيني إنها توصل للشباب. أنا مش عايز أقدم غنوة لأم كلثوم في ساعة.. أنا عايز أقدم تجربة لأسرة مصرية أول ما تخش من الباب ترجع سبعين سنة ورا. أول لما تخشي تبقي في رحاب الست.. ترجعي سبعين تمانين سنة ورا وزمن مختلف تمامًا وممتع ومسلي.. فيه غنى ورقص وتعرّف على الشخصيات.. وكل حاجة بقى تلات أربع ساعات."
فخر بفريق الشباب وروح العمل الجماعي
وفي سياق حديثه، أعرب عن فخره بجميع أفراد فريق العمل رغم صغر سنهم:"أنا كان معايا تيم شباب صغيرين.. الشباب اللي بفخر بيهم لأنهم دايمًا عندهم أفكار، ومن غير التيم ده مش عايز أذكر أسماء علشان مانساش حد. ومن غير الشباب دول عمر ما كان العرض هيبقى بالشكل ده،ومش بس العرض.. ده قبل العرض وبعد العرض، هو وحدة متكاملة."
للجمهور كله.. أم كلثوم صوت الشعب
واختتم العدل حديثه مؤكدًا حرصه أن تكون أسعار المسرحية في متناول جميع المصريين:"على فكرة أسعار العرض نص أسعار تشارلي تشابلن.. أنا كنت مصر إن أي مصري أو أي أسرة مصرية عادية تقدر تخش…وأنا هلف بيها مصر كلها لأن أم كلثوم صوت الشعب.. فلازم مصر كلها تتفرج عليها."