دينا هشام عن فرحها: "ده فرحي.. أعمل اللي يفرحني مش اللي لازم"
علقت دينا هشام، ابنة الدكتورة هبة قطب، على الجدل الكبير الذي أثاره حفل زفافها على مواقع التواصل الاجتماعي، مشددة على أن القرارات الخاصة بيوم زفافها كانت نابعة من قناعتها الشخصية وتفاهمها مع زوجها.
وأكدت دينا قائلة: “ده فرحي وأنا اللي أعمله، مفيش حاجة اسمها لازم، كل اللي حصل كان بتفاهم كامل بيني وبين جوزي، في حاجات كنت عاوزاها وهو وافق، وفي حاجات هو كان عايزها ووافقت أنا عليها”.
دينا هشام: “تورتة الفرايد تشيكن عشان كنا عايزين ناكل”
يقدم لكم موقع “وشوشة” أبرز تصريحات دينا هشام لبرنامج "وان تيك"، حيث ردّت على الانتقادات التي طالت اختيارها لـ "تورتة الفرايد تشيكن" بدلًا من التورتة التقليدية، وقالت بابتسامة: “إيه أكتر حاجة الناس بتحبها غير الفرايد شيكن؟، إحنا كنا عايزين ناكل، وبصراحة اتبسطنا جدًا، لأن مش لازم نعمل اللي الناس متوقعة نشوفه”.
وأضافت أنها لا ترى مبررًا للدهشة أو الهجوم، موضحة أن كل التفاصيل تم اختيارها لأنها تُسعدها هي وزوجها: “أنا اتبسطت أوي، وطول الوقت كان عندي هدف واحد، أعمل اللي يفرحني مش اللي لازم”.
دينا هشام: “الجونة جزء من شهر العسل ومفيش حاجة تفوتني”
وأوضحت دينا سبب تواجدها في مهرجان الجونة السينمائي بالرغم من أنها حديثة الزواج، حيث أثير تساؤل حول تركها لشهر العسل، وعن ذلك قالت: “أنا دايمًا حريصة إن مفيش حاجة تفوتني، والمهرجان حدث مهم جدًا، وبالنسبة لشهر العسل، إحنا بالفعل روحناه وكان من 10 لـ 12 يوم، فكان تمام جدًا بالنسبالنا”.
وأضافت أن أجواء الجونة لم تفسد لحظات شهر العسل بل أضافت لها: “الفايبس هنا جميلة جدًا، وفعليًا إحنا كأننا بنكمل شهر العسل وسط أجواء ممتعة”.
دينا هشام: "السعادة على طريقتنا مش لازم نرضي الناس"
واختتمت دينا هشام حديثها بالتأكيد على أن كل تفاصيل حفل زفافها نُفذت بهدف إسعادها هي وزوجها فقط، بعيدًا عن القوالب التقليدية أو التوقعات المجتمعية، واعتبرت دينا أن الرسالة الأهم من يوم فرحها كانت بسيطة جدًا: “اعمل اللي يريحك ويفرحك، مش اللي الناس شايفاه لازم”.