منة شلبي تفتح قلبها: بدايتي كانت مع يسرا.. و"التخن" كان أكبر عقدي
تحدثت الفنانة منة شلبي، عن بداياتها الفنية التي تصفها بـ"المحظوظة"، قائلة إنها لم تتخيل أن أول أدوارها الدرامية ستكون أمام النجمة الكبيرة يسرا، في مسلسل "أين قلبي" للمخرج مجدي أبو عميرة.
وأضافت خلال لقائها مع الإعلامية لميس الحديدي في برنامج "الصورة" المذاع على قناة النهار: "أنا كنت لسه في بدايتي، وفجأة لقيت نفسي في مشهد مع يسرا، كنت مرعوبة بس فرحانة جدًا، الدور كان اسمه توحة، وكنت حاسة إن ده وش الخير عليّ".
“توحة الشردوحة”.. لقب شعبي لا يُنسى
واستعادت منة ذكريات تلك الفترة بموقف طريف لا يزال عالقًا في ذاكرتها، قائلة: "وقتها كنت بصور فيلم (فيلم هندي) مع أحمد آدم، وكنت لسه وش جديد، وفجأة لقيت شوية عيال في الشارع ماشيين ورايا بيقولوا: توحة الشردوحة! ضحكت جدًا، حسيت إن الناس حبت الشخصية وافتكرتني بيها".
وأشارت إلى أن هذا التفاعل البسيط من الجمهور كان بمثابة دفعة قوية جعلتها تؤمن بأنها تسير في الطريق الصحيح، مضيفة: "من ساعتها عرفت إن الناس ممكن تفتكرك من حاجة صغيرة لو كنت صادقة فيها".
عقدة “التخن”.. وقرار التغيير بعد “الساحر”
وتطرقت منة إلى التحول الكبير في شكلها واهتمامها بالرشاقة، بعد أن علّقت لميس الحديدي مازحة على تغير ملامحها منذ ظهورها الأول، لترد منة قائلة: "أنا كنت متعقدة من التخن، ولما عملت فيلم (الساحر) كنت تخينة ومكنتش عارفة ألبس، حسيت إن ده هيخليني دايمًا محصورة في أدوار معينة أكبر من سني".
وتابعت: "قررت أخس مش علشان الشكل بس، لكن علشان أبقى حرة كممثلة، أقدر أختار الأدوار اللي تعجبني، وكمان كبنت أحب ألبس اللي يريحني من غير ما أبص في المراية بحرج".
منة شلبي.. بين الصدق والحرية
أنهت منة حديثها بالتأكيد على أن سر استمرارها في النجاح هو الصدق مع نفسها ومع الجمهور، مضيفة: "أنا مش بحب أعيش دور مش أنا او اطصنع، سواء في حياتي أو في التمثيل، وعمري ما هخاف أقول إن أنا كنت عندي عقدة أو غلطت.. كل ده بيكوّن الإنسان الحقيقي اللي جوايا".