نور قدري: رجعت لنقطة الصفر بعد الثورة
كشفت الفنانة نور قدري عن عدد من المحطات الفارقة في حياتها، والتي شكلت وعيها بقدرتها على الاستمرار وتخطي التحديات، خاصة في أعقاب ثورة يناير، التي وصفتها بأنها كانت نقطة تحول أعادتها إلى نقطة الصفر في مشوارها المهني، وأوضحت أن تلك المرحلة كانت بمثابة اختبار حقيقي لقوة عزيمتها وإصرارها على الاستمرار، قائلة: "لما حصلت الثورة رجعت للصفر في شغلي".
وأضافت خلال تصريحاتها لبرنامج "miniz": "أنا كنت بشتغل تلت أربع أعمال في السنة، وكل سنة بيكون عندي شغل منتظم، لكن لما حصلت الثورة وكل حاجة وقفت، أنا قعدت تلت سنين مش بشتغل"، وأشارت إلى أن تلك الفترة شهدت ظهور وجوه جديدة وشركات إنتاج مختلفة عن التي اعتادت العمل معها، ما اضطرها لإعادة بناء مشوارها المهني من جديد، مضيفة: "ابتديت فعليًا من الصفر، ومكنش قدامي غير إني أخد كورسات علشان أقدر أتأقلم وأشوف الدنيا وصلت لفين".
وأوضحت قدري أنها لا تميل للسعي وراء الفرص بشكل مباشر، حيث قالت: "أنا مش من طبعي أروح أقول لحد إني عاوزة أشتغل، وده السبب اللي مخليني مش على طول بشتغل".
وتابعت: "الشغل المناسب بييجي بالصدفة، ده نصيبي، وأنا مؤمنة إنه هيجيلي، فلو كنت عايزة أرجع، مكنش ينفع أروح أقول لحد إني عاوزة أشتغل".
كما أشارت إلى أنها التحقت بالورشة الخاصة بالمخرج خالد جلال، لأنها كانت تعلم أن هذا المكان يحظى باهتمام واسع، مضيفة: "كنت عارفة إن كل الناس هتيجي تتفرج هنا، كان بالنسبة لي الطريق أو البوابة اللي عندي يقين إنها هتكون سبب في رجوعي للوسط مرة تانية".
واختتمت نور قدري حديثها برسالة ملهمة، حيث قالت: "مبقتش شايفة دلوقت إن الأيام بتكسر قد ما بتعلم، إنت هتفضل تتعلم في الحياة لآخر يوم في عمرك، لو هتحسبها إن الدنيا كسرتك، مش هتعرف تتعلم، ومش هتعرف تتقدم".
وأضافت: "إنما لو شوفت اللي حصل إنه تجربة اتعلمت منها، وعرفت إيه اللي استفدته وإيه اللي هغيره علشان أوصل لأحسن، ساعتها هتوصل للخطوة اللي بعدها"، مؤكدة: "اللي هيكسرك هيقويك تاني".