تعرف على أبرز تصريحات أحمد السعدني في برنامج "ab talks" مع أنس بوخش
حل الفنان أحمد السعدني ضيفًا على برنامج "ab talks" مع الإعلامي أنس بوخش، وتحدث خلال اللقاء بصراحة شديدة عن محطات فارقة في حياته وتجارب صعبة مرّ بها، وجاءت أبرز تصريحاته كالتالي:
1ـ أصعب لحظتين في حياتي كان خبر وفاة والدي النجم الكبير صلاح السعدني، وخبر وفاة خالي اللي كان بمثابة أعز أصدقائي، والمفارقة إن الاتنين حصلوا وأنا نايم، ودي من أقسى الطرق اللي ممكن يستقبل بيها الإنسان خبر الموت.
2- لحظة فقدان الأب بتخليك تواجه حقيقة إن "سنة الحياة" مش اختيار، وإنك لازم تقبل فكرة إنك تفقد أقرب الناس ليك، حتى لو قلبك رافض ده.
3- وفاة طليقتي كانت صدمة عمري.. في لحظة واحدة حسيت إني كبرت عشر 15 سنة، وكان عندي إحساس رهيب بالذنب وتأنيب الضمير، وده خلاني أعيش فترة طويلة في صراع داخلي لحد ما قدرت أتعامل مع الإحساس ده بالعقل والتحليل.
4- أنا من الشخصيات اللي مش بتحب تتكلم عن حياتها الشخصية، وعمري ما سعيت إني أكون "حديث الناس"، أفضل إن الناس تعرفني من شغلي فقط.
5- التجارب القاسية بتغيّر نظرتك للدنيا، بتفهمك إن السعادة مش في الأحداث الكبيرة.. بالعكس اليوم العادي ممكن يبقى أعظم يوم لما تعيشه بسلام ورضا.
6- مع مرور السنين بقيت أكتشف إن الخوف جزء من شخصيتي.. عندي "سِنة خوف" يمكن لأنه عمري ما حبيت المسئولية الكبيرة، وبخاف جدًا على الناس اللي حواليا.
7- طفولتي مع أب مشهور كان فيها تحديات، أوقات كنت أحس بالضيق لما نخرج مكان والناس تتجمع حوالينا ومش نعرف نقعد براحتنا، وده خلاني أخاف على ولادي من التجربة دي.
8- فكرة الشهرة نفسها عمري ما حبيتها، وحتى التمثيل في بداياتي ماكنش في نيتي أبقى نجم أو مشهور، كنت بس عاوز أصدق اللي بعمله.
9- أبويا علمني دروس كتيرة في الحياة والفن.. كان رجل مثقف وإنسان جميل، ويمكن من أهم النصايح اللي قالهالي لما قولتله عاوز أمثل: "صدق اللي بتعمله، ولو إنت صدقته الناس هتصدقه".
10- اتعلمت من والدتي معنى العطاء.. هي بحر من العطاء بشكل مبالغ فيه أحيانًا، لدرجة إني دايمًا بقولها ارتاحي، لأن عطاياها للآخرين ما بتنتهيش.
11- ابني الكبير شبهي جدًا في صفاته، حتى في إنه مش بيحب التلامس، وأنا كده بطبعي، لكن مع ولادي تحديدًا الموضوع مختلف.