كريم فهمي: مراد السويفي يشبهني.. وزوجتي شريكتي في النجاح
كشف الفنان كريم فهمي عن تفاصيل شخصيته "مراد السويفي" في مسلسل "ونحب تاني ليه"، مؤكدًا أن الدور كان قريبًا من شخصيته الحقيقية، وأن الشخصية تحتوي على عيوب إنسانية تجعلها أكثر واقعية.
وقال كريم، خلال لقائه في برنامج “أسرار النجوم” على إذاعة "نجوم إف إم": "كل ممثل بيحب يشتغل في مساحة يكون مرتاح فيها، ومراد السويفي كان كده بالنسبالي، فيه تفاصيل قريبة مني جدًا".
وأضاف: "مراد عنده عيوب زي الغيرة العمياء، وده بيخليه يتصرف غلط، والمؤلف ما عملوش ملاك، لأنه مفيش حد كامل، وده اللي خلى الشخصية أقرب للواقع".
وعن تعاونه مع الفنانة ياسمين عبدالعزيز، أوضح كريم: "ماحصلش بينا أي مشكلة خالص، بالعكس الناس كانت متوقعة صدام لكن أنا استمتعت جدًا بالشغل معاها، وبتمنى أشتغل معاها تاني في فيلم، هي دمها خفيف جدًا واشتغلت المسلسل بإحساس عالٍ، وبعتبره مسلسل ياسمين عبدالعزيز بالدرجة الأولى".
وشهدت الحلقة مداخلة هاتفية من زوجته دانيا، التي تحدثت عن تشابه شخصية كريم في الحقيقة مع "مراد السويفي"، قائلة: "هو طيب وحنين جدًا وبيهتم بأدق تفاصيل عيلته، وكنت حاسة إنه مش بيمثل، هو كان طبيعي جدًا"، وأضافت: "بحبله" حسن وبقلظ" و"علي بابا" "نحب تاني ليه"، وفيلم" ديدو".
وتابعت: "دلوقتي بقيت أهدى من زمان بخصوص المعجبين، وبحبهم وبصورهم معاه كمان، بس هو طيب أوي، وده أحيانًا بيخليه مياخدش حقه، وفي البيت هادي جدًا وده بيخليني أتعصب".
من جانبه، أكد كريم فهمي مدى تأثير دعم زوجته على مسيرته، قائلًا: "وقفتها جنبي من أول ما بدأت كانت عظيمة، ومفيش اسكريبت بشتغل عليه إلا لو بتقرأه، حتى لبسي في الأعمال بتختاره، وهي سبب كبير في راحتي النفسية، وعمري ما ألاقي زيها".