لبلبة: أمي كانت رافضة مشاهد البوس مع عادل إمام.. بس الفن له منطقه
كشفت الفنانة القديرة لبلبة، في لقاء تلفزيوني سابق، عن كواليس العلاقة الفنية والإنسانية التي جمعتها بالفنان الكبير عادل إمام، مؤكدة أن ما بينهما “كيمياء فطرية” لا يمكن تفسيرها، وأن الجمهور دائمًا ما كان يشعر بها ويصدقها.
وقالت لبلبة:“أنا نفسي مش عارفة… إحنا الاتنين لما بنقعد مع بعض كأننا اتخلقنا عشان بعض الجمهور بيحبنا وبيحب يشوفنا مع بعض. التركيبة دي محدش يقدر يكررها، مين مرات عادل إمام في السينما؟ يعني هي لبلبة”.
وأضافت لبلبة:"كنت بسافر لتونس أو المغرب، كل الناس تسألني عن عادل إمام العلاقة اللي بينا واضحة قوي قدام الناس”.
وتطرقت لبلبة إلى عدم تعاونهما مسرحيًا رغم الصداقة الفنية، قائلة:“ما عملتش معاه مسرح، رغم إن حصل ترشيح قبل كده، لكن كنت مشغولة وقتها بفيلمين، وكمان كنت بعمل مسرح تاني أنا شايفة إن المسرح ممكن يستفيد مني، بس عادل إمام على المسرح زعيم فعلاً، ووجودنا مع بعض كان شكله حلو جدًا”.
كما كشفت لبلبة عن أول لقاء فني جمعها بعادل إمام في أحد الأفلام، وقالت:“أول فيلم اشتغلنا فيه مع بعض كان هو مش الكابل بتاعي، كان الكابل بتاع سهير رمزي، وأنا الكابل بتاعي نور الشريف.
في مشهد دخلنا سوا تحت السرير وطلعنا بنفس التعبير والحركة! قالوا لنا: "اتفقتم تحت السرير" بس الحقيقة لأ، حسيت وقتها إن في بينا تفاهم غريب”.
وتابعت لبلبة:“كنت ببص لعينيه دايمًا، عشان ساعات بيحب يزود من عنده في الكلام، فكنت بفهمه من عنيه، إحنا كنا بنقرأ بعض من غير ما نتكلم”.
وردًا على الانتقادات التي طالتها بخصوص ملابسها الجريئة في بعض الأدوار، علّقت لبلبة:“ده كان موضة وقتها، كل الستات كانوا بيلبسوا قصير. وبالنسبة للمشاهد الرومانسية، أمي كانت بتعترض على فكرة البوس، خصوصًا من عادل إمام، ولما كبرت شوية قالت لي: "مش عايزين السكة دي" بس دايمًا كنا بنبدأ الفيلم متجوزين، وكان طبيعي في أول ليلة جواز يكون في حضن أو بوسة، ده منطق الدراما”.