غادة عبد الرازق تكشف جوانب خفية من شخصيتها وحياتها بعيدًا عن الأضواء
تحدثت الفنانة غادة عبد الرازق عن جوانب مختلفة من شخصيتها وحياتها بعيدا عن الأضواء، كاشفة عن طبيعتها الخجولة، وحبها للتسامح والطيبة، إلى جانب حديثها عن بساطتها في حياتها اليومية وعدم اهتمامها بالخروج كثيرا أو الظهور بشكل متكلف، وذلك خلال استضافتها في برنامج ABtalks مع الإعلامي أنس بوخش.
غادة عبد الرازق: أنا ست خجولة جدًا
كشفت غادة عبد الرازق عن مفاجأة بشأن شخصيتها، موضحة أن ظهورها في البرامج وقدرتها على الرد السريع لا يعكسان طبيعتها الحقيقية، مؤكدة أنها شخصية خجولة للغاية.
وقالت غادة عبد الرازق: "في ناس بتفتكر إن أنا ردودي عشان بطلع في البرامج بعرف أرد سريع وإن أنا ست قوية وأقدر أتكلم في أي كلام خالص، أنا ست جدًا جدًا جدًا خجولة".
وأضافت: "لو حد وقف قصادي قاعد يشكر فيا، أنا عن نفسي ما بعرفش أرد عليه، ما بعرفش أقوله إيه، بقى خجولة جدًا لدرجة إن الكلام بيطلع مني لو إنت سمعته تقولي: غادة بتقول إيه؟ يعني إيه اللي بتقوله؟".
غادة عبد الرازق: مسامحة وطيبتي مش عبط
وتطرقت غادة عبد الرازق إلى صفة التسامح التي تتمتع بها، موضحة أن طيبتها ليست ضعفا كما يعتقد البعض، وإنما نتيجة لطبيعة البيئة التي نشأت فيها.
وقالت: "غادة مسامحة جدًا زي ما إنت بتقول. غادة طيبة جدًا، والناس بتفتكر الطيبة دي عبط مني، هو مش عبط خالص".
وتابعت غادة عبد الرازق: "أنا اتربيت في بيت طيب، فبالتالي طلعت مع أهل طيبين، فبقت دي صفة من صفاتي، مش عارفة أبقى شريرة".
غادة عبد الرازق تكشف سبب ابتعادها عن الخروج
كما تحدثت غادة عبد الرازق عن حياتها اليومية، مؤكدة أنها شخصية بسيطة ولا تفضل الخروج كثيرا، لافتة إلى أن من بين الأسباب التي تجعلها تفضل البقاء في المنزل عدم حبها لقضاء وقت طويل في التجهيز قبل الخروج.
وأوضحت غادة عبد الرازق: "أنا صحبة صحابي، بسيطة جدًا، يعني ما بخرجش كتير، واللي خلاني ما بقيتش بخرج كتير إن أنا ما بحبش أخد وقت لا في اللبس ولا في المكياج ولا في الشعر".
وأضافت: "فدايمًا بخرج لما شعري، ومافيش مكياج في وشي، وأول بنطلون جينز على أول تيشيرت، لو ممكن أنزل بالشراب وعليه جزمة".
غادة عبد الرازق: اللي بيطلع على الشاشة ده شغلي
وأشارت غادة عبد الرازق إلى أن الصورة التي تظهر بها أمام الجمهور تختلف عن طبيعتها في حياتها الشخصية، مؤكدة أن الاهتمام بالمكياج والمظهر اللامع جزء من طبيعة عملها أمام الكاميرا.
وقالت غادة عبد الرازق: "أنا أبسط بكتير، اللي بيطلع على الشاشة ده شغلي، ده أكل عيشي، إن أنا أحط المكياج وأبقىكل الحاجات بتلمع وتبرق فيا، أنا ما بحبش ده".
وتأتي تصريحات غادة عبد الرازق خلال حوارها مع أنس بوخش في برنامج ABtalks، حيث كشفت جانبا مختلفا من شخصيتها بعيدا عن الصورة التي اعتاد الجمهور رؤيتها بها على الشاشة.
