تامر أمين يوجه رسالة إلى هاني أبو ريدة: اظهر وبان وخد موقف
وجه الإعلامي تامر أمين رسالة إلى المهندس هاني أبو ريدة، رئيس الاتحاد المصري لكرة القدم، مطالبا إياه بالظهور والتدخل لحل الأزمات التي تحيط بالمنتخب الوطني خلال الفترة الأخيرة، خاصة في ظل الجدل المثار حول حسام حسن وعلاقته باللاعبين والإعلام، إلى جانب ما تردد عن أزمات داخل بعثة المنتخب في جنوب السودان.
وقال تامر أمين، خلال برنامجه "آخر النهار" المذاع عبر قناة النهار: "أتمنى إن أنا ألاقي له إجابة عند حضراتكم أو عند المعنيين بالأمر يعني، هو فين المهندس هاني أبو ريدة؟ فين المهندس هاني أبو ريدة من كل اللي بيحصل في منتخب مصر وأزمات حسام حسن وأزمات المنتخب والإعلام مع المنتخب والمنتخب مع الإعلام".
وتابع: "واللي حصل في بعثة جنوب السودان والمشاكل اللي قيل إن حصلت ما بين نائب رئيس الاتحاد المهندس خالد الدرندلي مع التوأم ومع بعض اللاعبين، فأنا سؤالي البسيط المجرد من أي هوى، فين رئيس الاتحاد؟ فين رئيس المنظومة دي؟ في شخص اسمه المهندس هاني أبو ريدة رئيس اتحاد المصري لكرة القدم".
وأضاف: "محدش يقول لي مالوش علاقة، إحنا لما بنتكلم عن المشاكل بتحصل في الدوري، اتحاد الكرة يطلع يقولك إحنا ما لناش دعوة، الدوري ده اللي بيديره رابطة الأندية، اتكلموا معاهم إحنا علاقتنا بس بالمنتخبات ، إحنا دلوقتي في المنتخبات، ومش أي منتخب، ده المنتخب الأول اللي هو الصورة والواجهة ومحط اهتمام الجماهير الكروية المصرية كلها".
وأوضح أن ملف المنتخب "بيغلي بقاله أسبوعين، وتحديدا من يوم 24 سبتمبر الماضي، من ساعة ما كان فيه مؤتمر صحفي للكابتن حسام حسن قبل مباراة مصر وأنجولا في التصفيات الأفريقية هنا في القاهرة، وقال الكلام المتعلق بالأندية والأندية بتعمل وما بتعملش وما بتجهزش، وكلامه عن كابتن الفريق محمد الشناوي".
وأشار إلى أن حسام حسن عاد عن تصريحاته وقدم اعتذاره، قائلا: "صحيح كابتن حسام حسن رجع عن هذه التصريحات واعتذر ووضحها وقيم الشناوي وقدره، كل ده تمام مفيش مشكلة، بس برضه سؤالي فين رئيس الاتحاد؟".
غياب هاني أبو ريدة عن المشهد
واستكمل: "سمعنا تصريحات للمهندس خالد الدرندلي، وسمعنا تصريحات لأعضاء مجلس الإدارة، وسمعنا تصريحات من كل المحللين الرياضيين وسمعنا تصريحات وبيانات رسمية صادرة من الأندية، وأقواهم طبعا البيان القاسي الحازم اللي أصدره النادي الأهلي".
وتساءل تامر أمين عن أسباب غياب رئيس اتحاد الكرة عن المشهد، قائلا: "ما هذا الاختفاء لرئيس المنظومة ورئيس الاتحاد سببه إيه؟ يعني لا سمعنا كلام ولا ظهور لحضرتك تقول: والله إحنا بنعمل كذا، أو هنهدي الأجواء حتى، أو حتى نتدخل عشان أقعد الناس مع بعضها ونتكلم، وإنه لو فيه أي ضغائن أو فيه مشاكل وخلافات وكلام من ده أحلها باعتباري كبير العيلة الكروية".
وأضاف: "أو مثلا نفتح تحقيق باعتبارنا المسؤولين عن إدارة المنظومة بتاعة المنتخبات، فهنفتح تحقيق قانوني وإداري هو المنتخب ونشوف إيه اللي حصل، ولو فيه حد أخطأ هنعاقبه وكده. مفيش. كأن الأمر لا يعنيه، وكأن مفيش أمر أساسا".
وأكد أن عدم تدخل رئيس اتحاد الكرة في الوقت الحالي يمثل خطأ، قائلا: "وده في رأيي خطأ كبير جدا يا بشمهندس هاني، لأنه ترك الأمور كده تغلي، هتوصل إلى حالة الغليان اللي يؤدي إلى الانفجار".
وتابع: "حضرتك شايف اللي حاصل في البرامج الرياضية، واللي حاصل على مواقع التواصل الاجتماعي، ولا حديث تقريبا لجماهير الكرة في الشارع وفي السوشيال ميديا إلا عن المنتخب وحسام حسن وعلاقته باللاعبين، طب وضع محمد صلاح إيه؟ اللي سافر ومرجعش، وما ظهرش في ماتش امبارح بتاع جنوب أفريقيا".
واختتم تامر أمين رسالته قائلا: "فكرة الهروب أو فكرة الاختفاء أو فكرة الانسحاب وقت اللزوم أنا رأيي إنها خطة يعني فاشلة تماما، وتضر أكتر ما تفيد. ده اللحظة للاتحاد المصري يقول نحن هنا، ده الوقت".
وأضاف: "أنا وقت الانتصارات ووقت التعب والدنيا ماشية والسيستم ماشي وكل حاجة حلوة، آه أنا أختفي وأسيب الدنيا ماشية والحمد لله مش محتاج أتدخل، لكن أتدخل إمتى؟ عند اللزوم هل فيه لزوم أكتر من التدخل دلوقتي من اتحاد الكورة؟ لما ألاقي الدنيا مولعة والكل الكل بيشتغل شغلانة غير شغلانته".
واختتم رسالته الموجهة إلى هاني أبو ريدة بقوله: "ده الوقت اللي المفروض أطلع بقى أقول ستوب، فيه كبير للقصة هنا، وإحنا اللي هنديرها وإحنا اللي هنظبطها وإحنا اللي هنصلحها، ولا نسيبها؟ لأنها عمرها ما تتحل لوحدها بالعكس، هتتعقد أكتر وهتصل إلى درجة من العقدة مش هنعرف نحلها، فأنا رسالتي للمهندس هاني أبو ريدة: اظهر وبان واتكلم وخد موقف باعتبارك رئيس اتحاد كرة القدم المصري".
