سلوى عثمان لـ"وشوشة": عشنا فرحة نصر أكتوبر في البيت.. وأطالب الأجيال الجديدة بالانتماء لمصر
تحدثت الفنانة سلوى عثمان عن ذكرياتها مع انتصارات حرب أكتوبر المجيدة، مؤكدة أنها كانت وقتها في القاهرة وتابعت أخبار الحرب وبيانات النصر عبر وسائل الإعلام، مشيرة إلى حالة الفخر والسعادة التي عاشها المصريون عقب عبور قناة السويس وتحقيق الانتصار.
وقالت سلوى عثمان في تصريح خاص لـ"وشوشة": "أنا وقت الحرب كنت هنا في مصر، يعني مكنتش في حتة، بس كنا متابعين أخبار الحرب، وتابعنا طبعًا حالة النصر الجميلة اللي حصلت، وإحنا هزمنا عدونا بمنتهى السلاسة بحاجة بسيطة، بمياه، فكنا سعداء لما سمعنا الخبر، وإحنا كنا في مصر في القاهرة".
وأضافت سلوى عثمان قائلة: "أخبار النصر مبتستخباش سمعنا من الراديو والتليفزيون ومن كل الأجهزة الإعلامية، ولما حصل النصر كل الدنيا عرفت وإحنا عرفنا أكيد، وبالتالي كل مصر عرفت والمصريين كلهم كانوا في منتهى السعادة، وكان في فخر كبير جدًا إحنا حاسين بيه لما بلدنا انتصرت".
وتابعت سلوى عثمان حديثها قائلة: "أكيد كنا في البيت وشوفنا البيان وعرفنا إن إحنا عبرنا قناة السويس، والوقت ساعتها كان كل الناس مركزة مش في إنها تخرج وتروح وتيجي، لكن مركزة إنها تتابع التليفزيون وتشوف وتعرف أخبار النصر إيه".
ووجهت سلوى عثمان رسالة إلى الشعب المصري قائلة: "أحب أقول لكل الشعب المصري إنه يفتخر بجيشنا العظيم، جيش مصر الكبير العظيم اللي انتصر بقوته وبقوة إيمانه، مش بس بالقوة الحربية أو الجسدية، لكن بقوة إيمانه ببلده، وقوة إيمانه إنه لازم يدافع عن البلد دي ويحمي كل الشعب المصري".
واستكملت سلوى عثمان حديثها قائلة: "بقول لكل الناس ربنا يارب يخليلنا جيشنا ودايمًا نكون منتصرين، ويبقى دايمًا عندنا انتماء لبلدنا ولجيشنا ولرئيسنا، وده شيء يبقى عظيم جدًا".
وأكدت سلوى عثمان ضرورة غرس قيم الانتماء لدى الأجيال الجديدة، قائلة: "الأجيال لازم يرجعوا تاني يبقى عندهم انتماء من أول وجديد، أكتر من اللي موجود دلوقتي، ولازم يعرفوا إن وقت الجد جيشنا بيبقى موجود وبيدافع عننا، وبلدنا لازم نفضل نحبها وندافع عنها".
واختتمت سلوى عثمان حديثها بالتأكيد على أهمية أن يقوم كل شخص بدوره تجاه وطنه: "كل واحد لازم يعمل اللي عليه، اللي في الجيش بيحارب، واللي في المدرسة أو الجامعة أو الشغل أو أي مكان لازم يكون عنده انتماء لبلده، وإن الانتماء يخليه دايمًا يحاول يعمل كل اللي يقدر عليه عشان يحافظ على بلده وعلى أهله وعلى نفسه، ويبقى دايمًا فخور بالجيش اللي جاب لنا النصر، وفخور بكل حاجة في بلدنا، لأن بلدنا تستحق إن إحنا نفتخر بيها، ومش بس نفتخر بالبلد، كمان ننتمي ليها انتماء عظيم".
