سامي مغاوري لـ"وشوشة": نسينا الأكل والشرب بعد إعلان عبور القناة.. والأرض المصرية أغلى شيء في الكون

تحدث الفنان سامي مغاوري، عن ذكرياته مع حرب أكتوبر، مستعيدًا تفاصيل اليوم الأول للحرب، وكيف تابع المصريون البيانات الإخبارية حتى جاء الإعلان عن عبور القوات المسلحة المصرية قناة السويس ورفع العلم المصري على الضفة الشرقية للقناة.

وقال سامي مغاوري في تصريح خاص لـ"وشوشة": "بالنسبة لحرب أكتوبر، أكتر موقف أنا أفتكره إن يوم الحرب يوم 6 أكتوبر رجعت من الجامعة الساعة 2 الضهر، وكان فيه نشرة أخبار بتتذاع في الراديو الساعة 2، فإحنا فتحنا الراديو علشان نسمع نص النشرة".

وأضاف سامي مغاوري قائلاً:"قالوا بيان كده، بيان كان متفق عليه طبعًا مع القيادة العامة للقوات المسلحة، إن فيه بعض المناوشات وإن فيه زوارق حربية بتطارد بعض الزوارق الإسرائيلية اللي حاولت تدخل مياهنا الإقليمية فقلت: تاني؟ إحنا لسه هنطارد ولسه هنعمل؟ ودخلت نمت الضهر، لأن إحنا كنا في رمضان، وصحينا على الفطار".

وتابع سامي مغاوري حديثه قائلاً:"قبل المغرب مباشرة اتذاع البيان الأول بتاع الحرب، اللي هو إن قواتنا عدت قناة السويس وتم رفع العلم المصري على الضفة الشرقية".

واستكمل سامي مغاوري حديثه قائلاً:" طبعًا الفرحة كانت عارمة، نسينا الأكل ونسينا الشرب ونسينا الفطار ونسينا كل حاجة، ونزلنا، والناس بقت هتتجنن في الشوارع".

سامي مغاوري: الشعب المصري ما عندوش مستحيل

وعن أبرز الدروس التي خرج بها من حرب أكتوبر، قال سامي مغاوري:"من أكتر الدروس إن الشعب المصري ما عندوش مستحيل، لما بيحط حاجة في دماغه وعايز ينفذها، بينفذها".

واختتم  سامي مغاوري حديثه قائلًا:" كرامة الشعب المصري أهم عنده من أي شيء، وإن الأرض هي الأب وهي الأم وهي العيلة، والأرض المصرية أغلى شيء في الكون".