غادة طلعت تكشف لـ"وشوشة" تفاصيل دورها في "لعبة جهنم" وكواليس تعاونها مع محمد فراج

كشفت الفنانة غادة طلعت، في تصريح خاص لـ«وشوشة»، تفاصيل مشاركتها في حكاية «لعبة جهنم» ضمن مسلسل «القصة الكاملة»، موضحة أسباب انجذابها لشخصية «نوال»، وكواليس تعاونها مع المخرج إسلام خيري والفنان محمد فراج.

وقالت غادة طلعت: «الدور أنا طبعًا عجبني جدًا، الورق من أول ما قريته وتفاعلت جدًا مع شخصية نوال وعجبتني جدًا، لأنها شخصية مكتوبة بشكل حقيقي، إنها شبه الواقع جدًا، مش كليشيه أو بشكل سطحي، فبالرغم إن مشاهدها مش كتير، لكن هي كلها مشاهد شبه شخصيات حقيقية موجودة حوالينا».

وأضافت: «أنا حبيتها عشان أنا شفتها إنها من لحم ودم وإنها موجودة وإنها كمان ضحية، هي مش شريرة أو سيئة بشكل مطلق، أو مش طيبة بشكل مطلق، فهي كمان ضحية، وكمان عندها عيوب أو أخطاء زي علاء برضه، فحبيت جدًا الشخصية».

وتابعت: «بالرغم إنها مش مساحات كبيرة، لكن المساحة المتاحة لظهورها قدرت تخليها تتكلم عن ظروفها والدوافع اللي خلتها تنزل تشتغل فتاة ليل أو تبيع جسدها، زي ما علاء كمان باع جزء من جسده، اللي هي كليته وكده».

وأوضحت: «أنا حبيت جدًا الشخصية وتعاطفت معاها، مش بديها مبررات أبدًا، لكن عندها ظروف وعندها دوافع وعندها أسباب خلتها تضطر تنزل الشارع وتشتغل الشغلة دي، وده بان جدًا وهي بتحكي عن ظروفها وإنها كانت نفسها تعيش حياة شريفة وكده، واتجوزت وقررت إنها تجيل أو تشتغل بالحلال وكده، إلا إن جوزها ده نصب عليها وأخد كل فلوسها وكل أموالها ومشي، فخطفها وكسر قلبها وسرقها، فبشكل أو بآخر ما كانش عندها بديل من وجهة نظرها غير إنها تبيع جسمها وتنزل الشارع وتشتغل الشغلة دي».

وعن تعاونها مع المخرج إسلام خيري، قالت: «أهم سبب خلاني وافقت على الدور هو إن أنا أشتغل مع إسلام خيري. أنا اشتغلت معاه مسلسل جت سليمة واشتغلت معاه جودر واشتغلت معاه قهوة المحطة، فأنا بثق فيه جدًا وبشوفه مخرج كبير وعنده رؤية فنية وبيحترم الفن اللي هو بيقدمه وبيحب الممثل وبيحترمه».

وأضافت: «فهو مخرج مثقف وعنده وجهة نظر وعنده رؤية، فأنا بثق فيه ثقة كبيرة جدًا، فكنت بالرغم من قلقي إن الشخصية جريئة وأنا ما قدمتش شخصية جريئة بالشكل ده قبل كده، إلا إن ثقتي فيه كانت مضمونة وعارفة إنه مش هيقدم حاجة مبتذلة أو حاجة تضر أو حاجة بهدف الإثارة».

وعن تعاونها مع محمد فراج، أكدت: «أنا واثقة جدًا في فراج، وكنت سعيدة من البداية إن بطل الحكاية هو فراج، لأن أنا عارفة إنه ممثل كبير وممثل قوي وهو أستاذ في التقمص، وهو من أكبر وأهم المواهب في جيله، فهو نجم كبير حقيقي ومخلص لشغله».

واختتمت: «أنا اتخضيت أول ما شوفته بسبب التقمص الشديد اللي هو كان فيه وشكله واللوك اللي هو عامله، فأنا مبسوطة بالتجربة معاه ومبسوطة بالإشادات وردود أفعال الناس».

وتابعت: «أكتر حاجة مخلياني سعيدة إن الناس بتقول إن شخصية بائعة الهوى دي اتقدمت بدون ابتذال وبدون عري، الكومنتات دي خلتني طايرة من السعادة إن الجمهور بيفهم والجمهور ذكي والجمهور محدش بيضحك عليه».

وأردفت: «فرحانة جدًا إن هما شايفين إن شخصية نوال دي اتقدمت من غير ابتذال ومن غير عري ومن غير استسهال، شخصية عندها هدف وتفاصيل وشخصية من الواقع، مش هدفها إثارة الغرائز».

وعن إشادة المخرج خالد جلال بها، قالت: «مبسوطة جدًا بإشادة الأستاذ الكبير خالد جلال، لأن أنا خريجة مركز الإبداع وفراج خريج مركز الإبداع، فمبسوطة جدًا بالبوست اللي الأستاذ خالد جلال كتبه، وإنه وصفني بالوصف الحلو ده، فطبعًا دي حاجة كبيرة جدًا بالنسبة لي».

واختتمت: «شايفة إن ده كرم من ربنا، وأكتر حاجة مخلياني سعيدة إن الناس شايفة إن أنا قدمت بائعة الهوى بشكل مختلف، وبطريقة الكلام، مش بالجسم أو إثارة غرائز».