شريف رمزي لـ"وشوشة": نور الشريف مدرسة وجامعة في الفن والثقافة.. ونجم استثنائي لن يعوض
تزامنًا مع افتتاح معرض حضرة المحترم نور الشريف، استعاد الفنان شريف رمزي ذكرياته مع الفنان الراحل نور الشريف، مؤكدًا أن إقامة متاحف ومعارض توثق مسيرة كبار النجوم تمثل خطوة مهمة للحفاظ على تاريخهم وتعريف الأجيال الجديدة بما قدموه للفن، مشيرًا إلى أن نور الشريف كان من أبرز الفنانين الذين تركوا تأثيرًا كبيرًا في مسيرته الفنية والإنسانية.
وقال شريف رمزي في تصريح خاص لـ"وشوشة":"طبعًا حاجة جميلة جدًا إن يتعمل متاحف لنجومنا الكبار، وحاجة يعني تاريخ لكل ما قدموه وصنعوه والتفاني اللي عملوه في هذه المهنة وهذه الصناعة، وبتبقى فرصة جميلة جدًا لأن الأجيال اللي يمكن ما كانتش عرفته تعرفه أكتر وتعرف ده مين، لأن إحنا مهم جدًا نعرف نجومنا ومهم جدًا نعرف فنانينا الكبار واللي سبقونا".
وأضاف شريف رمزي قائلاً:"للأسف مشكلة الجيل الحالي إن هو يمكن مش كله اشتغل مع النجوم الكبار دول واتعلم منهم واستفاد منهم، وأنا كنت محظوظ إني اشتغلت مع أغلبهم، ومنهم طبعًا الفنان الكبير العظيم الأستاذ نور الشريف، اللي أنا بعتبره كان مدرسة، مش قادر أقول مدرسة، جامعة في صناعة السينما والثقافة والفن".
وتابع شريف رمزي حديثه قائلاً: "أنا عملت معاه آخر أفلامه بتوقيت القاهرة، وكان شرف ليا كبير إني أبقى في مسيرته بفيلم اختتم أو ختم بيه حياته، سعيد جدًا بوجودي في الفيلم، اتعلمت منه فوق الكثير، فادني على كل الأصعدة، علمني حاجات كتير الحقيقة في المهنة نفسها، مهنة التمثيل، وفي الثقافة بشكل عام".
وأوضح شريف رمزي قائلاً:"نصحني بقراءة مئات من الكتب، ولسة لغاية دلوقتي بقرا فيها، مكملتهاش، لكن كل يوم كان بيرشح لي عشر كتب وإحنا قاعدين، وبكتبهم وبكتب أسماءهم عشان أقراهم لاحقًا، يعني لحد دلوقتي بقرا فيهم وبدعيله»".
واستكمل شريف رمزي قائلاً:"وعدني، قالي: "إنت هتاخد جائزة في الفيلم ده، ولما تفتكرني يعني أول ما تاخد الجائزة ابقى افتكرني”، وفعلاً خدت أكتر من جائزة في نفس الفيلم اللي قالي عليه، وافتكرته وطلعت أهديت له الجوائز دي على المسرح وأنا بستلم الجوائز".
وأضاف شريف رمزي قائلاً:"الأستاذ نور الشريف نجم استثنائي لن يعوض، معتقدش إن السينما أو الفن أو صناعة السينما ممكن إن يطلع فيها زي حد نور الشريف ده، كان نجم استثنائي بكل معاني الكلمة، كان فاهم في كل شيء، كان ملم ومثقف في كل المجالات، مش بس مجال التمثيل، في كل الحرف في هذه الصناعة".
واختتم شريف رمزي حديثه قائلًا:"أنتج ومثل وأخرج، يعني عمل كل حاجة ونجح في كل المجالات، نجح في السينما بمئات الأفلام الناجحة، ونجح في التليفزيون، ونجح على المسرح، ونجح في الإذاعة، ونجح في كل حاجة، فالله يرحمه ويحسن إليه، وربنا يجمعنا بيه في الجنة، ونجم يعني ما ينساه تاريخ السينما".
