محمد حجاب لـ"وشوشة": مسلسل 180 يرصد حياة رجال الإطفاء وتحدياتهم
كشف المؤلف محمد حجاب تفاصيل مسلسل 180، موضحًا أنه يتناول عالم رجال الدفاع المدني، وبشكل خاص قطاع الإطفاء، وما يواجهونه من تحديات في عملهم، إلى جانب حياتهم وعلاقاتهم الإنسانية.
وقال محمد حجاب في تصريح خاص لـ"وشوشة":"بنتكلم عن رجال الدفاع المدني بوجه خاص قطاع الإطفاء، والدراما اللي بيعيشوها في حياتهم والتحديات اللي بيقابلوها في شغلهم إحنا عارفين طبعًا إن رجال الإطفاء هما الناس الوحيدين اللي بيجروا في قلب النار، في حين إن إحنا كمدنيين كلنا بنطلع نجري بعيد عنها".
وأضاف محمد حجاب قائلاً:"لما هما بيجوا، ما بنكونش عارفين حتى وهما بيجروا في قلب النار دي، هما حياتهم عاملة إزاي، يعني الدراما حياتهم عاملة إزاي؟ إيه شغله وحياته عاملة إزاي؟ هو مطالب بإنقاذ الناس، وفي نفس الوقت ربنا عز وجل ممكن يجعله شهيد في أي لحظة وهو بيحيي حياة بني آدم تاني".
وتابع محمد حجاب حديثه قائلاً: "إحنا بنشوف الدراما دي، بنشوف مدى قربهم وعلاقتهم ببعض، لأن هما بيختلفوا عن أي قطاع تاني، علشان بيقعدوا ساعات كتير جدًا مع بعض وهما بيطفوا الحرايق في البلاغات، وعندهم عادة كده دايمًا إنهم من كتر ما بيكونوا قريبين لبعض وهما بيطفوا، بيطلعوا كلهم يا بيموتوا كلهم، يعني مفيش حد بيموت لوحده، وهما بينهم وبين الشهادة فردة كعب صغيرة كده".
وأوضح محمد حجاب قائلاً:"إحنا مركزين على الحياة والجانب الإنساني والتحديات اللي بيخوضوها مع النار".
وعن تحضيرات مسلسل 180، قال محمد حجاب:"التحضيرات من زمان، الفكرة موجودة من زمان، والفكرة بتاعة الأستاذ كريم أبو ذكري، المنتج، إن إحنا نتكلم عن قطاع الإطفاء في الدفاع المدني، دي كان الأستاذ كريم هو اللي اقترحها".
وأضاف محمد حجاب قائلاً :"التحضيرات شغالة من بدري من زمان أوي، يمكن من شهور كتيرة، والحمد لله أخدنا شوط حلو في التحضيرات وفي الكتابة وفي الشغل، ودلوقتي معانا مخرج ومعانا أستاذ عمرو يوسف، وأنا مركز حاليًا على إن أنا أخلص إن شاء الله بإذن الله الكتابة بتاعتي، ومركز في كل التفاصيل".
وتحدث عن طبيعة الأكشن في العمل، قائلًا:"الأكشن في المسلسل ده مختلف شوية، يعني أكشن الانفجارات غير الأكشن بتاع الحرايق الانفجار بطلع من جوة لبرة، لا الحرايق بيبقى العكس أنا بشوف جوا بيحصل إيه، بشوف الكابلات وهي بتقع، السقف وهو بينهار، الأرض وهي بتتفتح، يعني التفاصيل بتاعة الأكشن مختلفة شوية ولها طبيعة كتابة معينة وطبيعة تنفيذ معينة".
وعن رسالته لعمرو يوسف ولأحمد ماجد المصري، قال:"أتمنى إن شاء الله إحنا كلنا بنجتهد ونحاول إن إحنا نعمل أقصى جهدنا، كل الناس اللي شغالة ما شاء الله عليها في قمة الجهد وقمة التعاون، ونتمنى يا رب إن شاء الله نعمل حاجة كويسة الناس تحبها وتلمس مشاعرها".
واختتم محمد حجاب حديثه عن موعد بدء التصوير، قائلًا:"الكلام المبدئي إن التصوير إن شاء الله في شهر 10".
