ياسر عزت لـ"وشوشة": لعبة جهنم مكتوبة بشكل عبقري.. ومحمد فراج أبدع في دوره

كشف الفنان ياسر عزت في تصريح خاص لـ"وشوشة"، تفاصيل مشاركته في حكاية لعبة جهنم، إحدى حكايات مسلسل القصة الكاملة، موضحًا أنه يجسد خلال الأحداث شخصية الدكتور محمد، وهو طبيب جراح يعيش في إحدى الدول العربية، ووالد سليم، الذي يجسد دوره الفنان محمد فراج.

وعن تفاصيل الشخصية، قال ياسر عزت:"بالنسبة للدور أنا بعمل دور دكتور محمد، وهو دكتور جراح عايش في بلد عربي، وهو والد سليم اللي بيستقطب محمد فراج عشان يعنل أعمال على الدارك ويب".

وعن أكثر ما جذبه للمشاركة في العمل، أوضح ياسر عزت قائلاً:"أكتر حاجة جذبتني في المسلسل الحقيقة الدراما بتاعته، مكتوبة بشكل عبقري، يعني نجلاء الحديني كاتبة إسكريبت متميز جدًا، بداية طبعًا من القصة، إنتي عارفة معمول عن القصة الكاملة لسامح سند، وهي قصة حقيقية، فاتكتب الإسكريبت نجلاء الحديني، ومن أول ما جالي الإسكريبت وأنا وافقت فورًا، لأني كنت عارف وحاسس إن المسلسل أو الحلقات دي هتنجح أوي، فيها واقعية حتى لو كانت قاسية، للأسف الواقع قاسي جدًا لكن حقيقية".

وأضاف ياسر عزت قائلاً:"طبعًا إخراج الأستاذ إسلام خيري عامل روح بديعة في المسلسل، ومجدي الهواري كإنتاج، الحقيقة كانت كل العناصر متكاملة، بس أكتر حاجة جذبتني هي القصة الحقيقية".

وتابع ياسر عزت عن السيناريو قائلاً:"اللي جذبني في السيناريو إنه متلاحق ومبني بشكل كويس، وأنا فاكر إن لما السيناريو اتبعتلي بتاع الـ3 حلقات قريتهم في جلسة واحدة، عشان الأحداث كانت شيقة جدًا ومتلاحقة الحقيقة".

وعن عدم جمعه بمشاهد مباشرة مع الفنان محمد فراج، قال:"للأسف مجمعنيش مشاهد بالنجم محمد فراج، لأن إحنا كنا على السايد التاني، كنت أنا على السايد التاني مع الولد، مع سليم، بس الحقيقة لما اتفرجت، محمد فراج عامل دور حلو أوي، أبدع، وفعلاً حسيت بكل تناقضات الشخصية وأنا بتفرج عليه، الحقيقة دور من أجمل الأدوار".

وعن أصعب المشاهد التي واجهته خلال التصوير، أوضح ياسر عزت :"مكنتش صعوبات على قد ما كانت إن أنا أمسك إحساس الأب اللي هو فقد واحد من أبنائه، وفي نفس الوقت هو بيحاول إنه ما يفتكرش الواقعة دي، وعنده علامات استفهام على ابنه، إنه ما استعانش بيهم وقت ما الحادث حصل".

وأضاف ياسر عزت قائلاً:"كان في مشهد لخص ده كله، المشهد اللي بينه وبين ابنه وبين سليم، وهو بيقوله يوريه اللعبة بتاعت أخوه، وبيسترجعوا الحادثة اللي حصلت. الحقيقة المشهد كان فيه كذا إحساس، وكان مطلوب مني إني أتعايش فيه بكل كياني، فده كان من أصعب المشاهد اللي اتصورت، وأعتقد إنه طلع كويس".

واختتم ياسر عزت حديثه بالإشادة بفريق العمل، قائلًا:"الأستاذ إسلام خيري عمله بشكل رائع، وعمر رزيق كان هايل، فالحمد لله".

تفاصيل عرض لعبة جهنم

وانطلقت أمس الجمعة 28 أغسطس 2026، أولى حكايات مسلسل القصة الكاملة، التي تحمل اسم لعبة جهنم، عبر منصة شاهد، ضمن مشروع درامي يقدم قصصًا مستوحاة من جرائم وقضايا حقيقية أثارت اهتمام الرأي العام في مصر.

وتتكون حكاية لعبة جهنم من 3 حلقات، وطرحت الحلقات الثلاث كاملة في تمام الساعة 12 منتصف الليل بتوقيت مصر والسعودية، ليتمكن الجمهور من متابعة أحداث الحكاية كاملة دون انتظار مواعيد أسبوعية لعرض الحلقات.