أحمد إبراهيم لـ«وشوشة»: «طايرين» تجربة مختلفة مع أحمد سعد
كشف الموزع والملحن أحمد إبراهيم تفاصيل تعاونه مع الفنان أحمد سعد في أغنية «طايرين»، ضمن ألبومه «إلكترو»، موضحًا أن العمل جاء بفكرة موسيقية مختلفة تعتمد على لون الـ«أفرو هاوس»، إلى جانب رسالة متفائلة تدعو إلى الاستمرار وعدم التوقف أمام الصعوبات.
وقال أحمد إبراهيم في تصريح خاص لـ«وشوشة»: «أنا مش أول مرة ألحن أحمد سعد، أنا قبل كده لحنت له ووزعت أغنيتين، واحدة اسمها “عمر اللي فات” السنة اللي فاتت، وأغنية “بسيط” وكانت لحن وتوزيع برضه، وكنت عامل له أغنية في الألبوم اسمها “حبيبنا” وكانت توزيع فقط».
وأضاف عن أغنية «طايرين»: «السنة دي أغنية “طايرين”، كلمات تامر حسين، ولحني وتوزيعي، وكانت الفكرة بالنسبة لي إني عايز أعمل حاجة أفرو هاوس، وده نوع من موسيقى الهاوس اسمه “أفرو هاوس”، وكنت عامل فكرة اللحن وبالاتفاق مع تامر كنا بنتكلم عن فكرة إنك تسيب نفسك للحياة، وما تعطلش وتكمل، وتطير بأحلامك، فالفكرة فيها تفاؤل شوية».
وتابع: «أحمد غناها حلو جدًا، والأغنية نزلت، والنوع ده مش موجود كتير في السوق، وده كان جزء من حماسي لتقديمه مع أحمد سعد، خصوصًا إني شايف إن الأغنية محتاجة لون موسيقي مختلف يليق بفكرتها».
وأشار إبراهيم إلى أن «طايرين» ليست تجربته الأولى مع هذا اللون الموسيقي، موضحًا: «أنا كنت عملت السنة اللي فاتت حاجة بنفس النوع ده ولكن بلحن مختلف، وهي أغنية “دايمًا فاكر” للفنان عمرو دياب، وكانت أفرو هاوس برضه».
واختتم حديثه مؤكدًا أن الـ«أفرو هاوس» أصبح من الألوان الموسيقية البارزة عالميًا خلال السنوات الأخيرة، قائلًا: «النوع ده موجود في العالم كله وبقاله سنتين تقريبًا متصدر المشهد، والحمد لله مبسوط بالتجربة وبالشكل اللي خرجت بيه “طايرين”».
